އައްޑޫ ހުޅުމީދޫގައި ހުންނަ ސ. އަތޮޅު ސްކޫލުގައި އޮފީސް އިމާރާތެއް އެޅުމުގެ މަޝްރޫޢު، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ މިއަދު ވަނީ ހަވާލުކޮށްފައެވެ. މި މަޝްރޫޢު އެމްޓީސީސީއާ ހަވާލުކުރީ 8.09 މިލިއަން ރުފިޔާގެ އަގަކަށް، 360 ދުވަސްތެރޭ ނިންމާ ގޮތަށެވެ.
މި މަޝްރޫޢުގެ އެއްބަސްވުމުގައި ސޮއިކުރުމުގެ ރަސްމިއްޔާތު ޝަރަފުވެރިކޮށްދެއްވީ ދިވެހިރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. މި ރަސްމިއްޔާތުގައި ކެބިނެޓް މިނިސްޓަރުންނާއި، ރައްޔިތުންގެ މަޖިލީހުގެ މެންބަރުންނާއި އަދި ސަރުކާރުގެ އިސްވެރިން ބައިވެރިވެވަޑައިގެންނެވިއެވެ. މިނިސްޓްރީ އޮފް އެޑިއުކޭޝަންގެ ފަރާތުން އެއްބަސްވުމުގައި ސޮއިކުރެއްވީ ސްޓޭޓް މިނިސްޓަރ އަލްފާޟިލް ހުސައިން ސައީދު މުޙައްމަދެވެ. އަދި އެމްޓީސީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރ، ޑެޕިއުޓީ ކޮމިޝަނާ އޮފް ޕޮލިސް (ރިޓަޔަރޑް) އަޙުމަދު ސަޢުދީއެވެ.
މި މަޝްރޫޢުގެ ދަށުން 6630 އަކަފޫޓުގެ ސަރަހައްދެއްގައި ދެ ފަންގިފިލާގެ އިމާރާތެއް ބިނާކުރެވޭނެއެވެ. މި އިމާރާތުގެ ކޮންމެ ފަންގިފިލައެއްގައި 3315 އަކަފޫޓު ހުންނާނެއެވެ. މި މަސައްކަތް އެމްޓީސީސީއާ ހަވާލުކޮށްފައިވަނީ އަންނަ އަހަރުގެ ތެރޭގައި ނިންމާގޮތަށް 360 ދުވަހުގެ މުއްދަތަކަށެވެ.
5,500 މީހުންގެ އާބާދީއެއް އޮންނަ އައްޑޫ ހުޅުމީދޫގައި މި މަޝްރޫޢު ނިމުމުން، ސ. އަތޮޅު ސްކޫލްގެ އިދާރީ މަސައްކަތްތަކަށް ގިނަ ލުއިތަކެއް ލިބިގެންދާނެއެވެ. މިއީ ތަޢުލީމީ ޖީލެއް ބިނާކުރުމަށްޓަކައި އެ ރަށުގެ ރައްޔިތުން ކުރަމުން އަންނަ މަސައްކަތަށް ލިބިގެންދާނެ މުހިންމު ކުރިއެރުމެއް ކަމަށް ބެލެވެއެވެ.
