އައްޑޫ ސިޓީގެ ހުޅުދޫ - މީދޫ ޞިއްޙީ މަރުކަޒު ހޮސްޕިޓަލަކަށް ބަދަލުކުރުމަށްޓަކައި އިތުރުކުރާ އިމާރާތުގެ މަސައްކަތް ހަވާލުކުރުމުގެ އެއްބަސްވުމުގައި ސޮއިކޮށްފިއެވެ. މި މަސައްކަތަކީ ސަރުކާރުން މި ދެރަށުގެ ރައްޔިތުންނަށް ޞިއްޙީ ޚިދުމަތްތައް ފުޅާކޮށް، ފެންވަރު ރަނގަޅުކުރުމަށް ކުރައްވާ މުހިންމު މަސައްކަތެކެވެ.
މި އެއްބަސްވުމުގައި ސޮއިކުރުމުގެ ރަސްމިއްޔާތު ބާއްވާފައިވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުޅުދޫ އަދި މީދޫ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގެ ތެރެއިންނެވެ. މި މަޝްރޫޢުގެ މަސައްކަތް ހަވާލުކުރެވުނީ ގްލަޓް އިންވެސްޓްމަންޓްސް ޕްރައިވެޓް ލިމިޓެޑާ އެވެ. މިއީ ރައީސްގެ ދަތުރުފުޅުގައި މި ސަރަހައްދުގެ ތަރައްޤީއަށް ދެއްވާ އަހައްމިއްޔަތު ހާމަވާ ކަމެކެވެ.
މި މަޝްރޫޢުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ޞިއްޙީ ވަޒީރު ޢަބްދުﷲ ނާޡިމް އިބްރާހީމެވެ. އަދި މަސައްކަތް ހަވާލުކުރެވުނު ކުންފުނި ކަމަށްވާ ގްލަޓް އިންވެސްޓްމަންޓްސް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އަޙްމަދު ޝިޔާމެވެ. މި މަސައްކަތް ނިމުމުން، ހުޅުދޫ އަދި މީދޫގެ ރައްޔިތުންނަށް ހޮސްޕިޓަލް ފެންވަރުގެ ޞިއްޙީ ޚިދުމަތްތައް ލިބިގެންދާނެކަމަށް ބެލެވެއެވެ.
