އައްޑޫ ސިޓީގެ ހިތަދޫ އަދި ފޭދޫގައި ޕާސްޕޯޓް ދޫކުރުމުގެ ޚިދުމަތް، އަދި ފޭދޫގައި ދިވެހި ރައްޔިތެއްކަން އަންގައިދޭ ކާޑު (އައިޑީ ކާޑު) ދޫކުރުމުގެ ޚިދުމަތް ރަސްމީކޮށް ފަށައިފިއެވެ. މި ޚިދުމަތްތައް ފެށުމުގެ މަސައްކަތަކީ ރައްޔިތުންނަށް ދޭންޖެހޭ މުހިންމު ޚިދުމަތްތައް އެންމެ ގާތުން އަދި އެންމެ އަވަހަށް ފޯރުކޮށްދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ސިޔާސަތުގެ ދަށުން ކުރިއަށްގެންދެވުނު ކަމެކެވެ.
މި ޚިދުމަތްތައް ރަސްމީކޮށް ފަށްޓަވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އައްޑޫ ސިޓީގެ ގުޅިފައިވާ ރަށްރަށުގެ ރައްޔިތުންނާ ބައްދަލުކުރެއްވުމަށް މިރޭ ހިތަދޫގައި ހުންނަ އައްޑޫ ހައި ސްކޫލްގައި ބޭއްވެވި ޖަލްސާގެ ތެރެއިންނެވެ. މި ޚިދުމަތްތައް ފެށުމަކީ އައްޑޫ ސިޓީގެ ރައްޔިތުންނަށް ދަތުރުފަތުރުގެ ލިޔެކިޔުންތަކާއި، ރަސްމީ ކާޑުތައް ހޯދުމަށް ކުރަންޖެހޭ ދަތުރުތަކާއި ދިމާވާ ދަތިތަކަށް ލުއިކަމެއް ގެނެސްދޭނެ ކަމެއްކަމަށް ބެލެވެއެވެ.
ޚިދުމަތް ފެށުމުގެ ރަސްމިއްޔާތުގައި މި ޚިދުމަތްތައް ރަސްމީކޮށް ފަށްޓަވައިދެއްވީ ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރާއި، ކޮންޓްރޯލަރ ޖެނެރަލް އޮފް އިމިގްރޭޝަން އަޙްމަދު ފަސީހެވެ. މި ދެ ބޭފުޅުންގެ ބައިވެރިވުމާއެކު މި ޚިދުމަތްތައް އައްޑޫ ސިޓީގެ މުހިންމު ދެ ރަށަށް ފުޅާކުރެވުނުކަން ފާހަގަކޮށްލެވެއެވެ.
ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓުގެ ޚިދުމަތް ރައްޔިތުންނާ ގާތުން އަވަހަށް ފޯރުކޮށްދިނުމުގެ ގޮތުން އެ ޚިދުމަތް މުޅި ރާއްޖެއަށް ފުޅާކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ސިޔާސަތެކެވެ. މި ސިޔާސަތުގެ ދަށުން، މާލެއިން ބޭރުގެ ރަށްރަށުގައި މިފަދަ މުހިންމު ޚިދުމަތްތައް ޤާއިމުކުރުމުގެ މަސައްކަތް މިހާރު ވަނީ ބާރަށް ކުރިއަށް ގެންދަން ފަށާފައެވެ.
