ޢާއިޝަތު ރަފާޙް ޢަލީ
"އަޅުގަނޑުގެ އެކުވެރިއަކު ދާދިފަހުން ކައިވެނިކޮށްފިއެވެ. ކައިވެނިކުރުމުގެ ކުރިން އޭނާ ނިޤާބު އަޅަމުން ދިޔަ ނަމަވެސް، ކައިވެނިކުރުމަށްފަހު އޭނާގެ ފިރިމީހާ އެދިފައިވަނީ ނިޤާބު ނަގައި، ހަމައެކަނި ހިޖާބު އެޅުމަށެވެ. މިއީ ފިރިމީހާގެ އިސްލާމްދީނުގެ ދޭހައިގައި އަންހެނުންނަށް ނިޤާބު އެޅުން ލާޒިމްކަމެއް ނޫން ކަމަށް ދެކޭތީއެވެ. މި ކަމާ ގުޅިގެން އަޅުގަނޑުގެ އެކުވެރިޔާ ވަނީ ހިތްހަމަނުޖެހިފައެވެ. މިފަދަ ހާލަތެއްގައި އަނބިމީހާގެ ހައިސިއްޔަތުން އަޅުގަނޑު ހުރިނަމަ، ފިރިމީހާގެ އެދުމަށް ކިޔަމަންވެ ނިޤާބު އެޅުން ދޫކޮށްލަންވީ ހެއްޔެވެ؟"
ޖަވާބު:
އަޅުގަނޑުމެންނަށް އެނގިފައިވާ ގޮތުގައި ނިޤާބަކީ އިސްލާމީ ޢިލްމުވެރިންގެ މެދުގައި ޚިޔާލު ތަފާތުވެފައިވާ މައްސަލައެކެވެ. ބައެއް ޢިލްމުވެރިން ދެކެވަޑައިގަންނަވާ ގޮތުގައި އަންހެނުން އާންމުންގެ ތެރެއަށް ނުކުންނައިރު މޫނު ނިވާކުރުމަކީ ވާޖިބު ކަމެކެވެ. ނަމަވެސް، ތިބާގެ ފިރިމީހާ މި ރައުޔަށް ތަބާނުވާނަމަ، އެއީ އޭނާގެ އަމިއްލަ ނިންމުމެކެވެ. އޭނާއަށް ތިބާގެ މައްޗަށް ނިޤާބު އެޅުން މަޖުބޫރުކުރުމުގެ ބާރެއް ނެތެވެ.
ތިބާ ނިޤާބު އަޅަން ބޭނުންވާނަމަ، އެއީ ތިބާގެ އަމިއްލަ ޙައްޤެކެވެ. ތިބާގެ ފިރިމީހާއަށް ތިބާގެ އަޅުކަމުގެ ކަންކަމުގައި ނުފޫޒު ފޯރުވުމުގެ ބާރެއް ނެތެވެ. އެހެންނަމަވެސް، އޭނާ ތިބާއަށް ހެޔޮލަފާ ނަޞީޙަދިނުމަކީ ރަނގަޅު ކަމެކެވެ. ތިބާ ނިޤާބު އެޅުމަކީ ވާޖިބު ކަމެއް ކަމަށް ނުދެކޭނަމަވެސް، އޭގައި ގިނަ ފަޟީލަތްތަކެއް ވާކަން ޤަބޫލުކުރެވިދާނެއެވެ.
އަދި އޭގެ ވާޖިބުކަމަށް ތިބާ ޤަބޫލުނުކުރިނަމަވެސް، އެއީ ތިބާއާއި މާތްﷲ އާ ގާތްކޮށްދޭ ކަމެއްކަމަށް ތިބާ ޤަބޫލުކުރެއެވެ. އެއީ އެއީ މުއުމިނުންގެ މައިންނަށް، ނަބިއްޔާގެ އަނބިކަނބަލުންނަށް ލާޒިމުކުރެވިފައިވާ ކަމެއް ކަމަށްވާތީއެވެ. މިކަން ސޫރަތުލް އަޙްޒާބުގެ 53 ވަނަ އާޔަތުގައި ބަޔާންވެގެންވެއެވެ.
ﷲ ސުބްޙާނަހޫ ވަތަޢާލާ ވަޙީ ކުރައްވާފައިވެއެވެ.
يَا أَيُّهَا الَّذِينَ آمَنُوا لَا تَدْخُلُوا بُيُوتَ النَّبِيِّ إِلَّا أَن يُؤْذَنَ لَكُمْ إِلَىٰ طَعَامٍ غَيْرَ نَاظِرِينَ إِنَاهُ وَلَٰكِنْ إِذَا دُعِيتُمْ فَادْخُلُوا فَإِذَا طَعِمْتُمْ فَانتَشِرُوا وَلَا مُسْتَأْنِسِينَ لِحَدِيثٍ ۚ إِنَّ ذَٰلِكُمْ كَانَ يُؤْذِي النَّبِيَّ فَيَسْتَحْيِي مِنكُمْ ۖ وَاللَّهُ لَا يَسْتَحْيِي مِنَ الْحَقِّ ۚ وَإِذَا سَأَلْتُمُوهُنَّ مَتَاعًا فَاسْأَلُوهُنَّ مِن وَرَاءِ حِجَابٍ ۚ ذَٰلِكُمْ أَطْهَرُ لِقُلُوبِكُمْ وَقُلُوبِهِنَّ ۚ وَمَا كَانَ لَكُمْ أَن تُؤْذُوا رَسُولَ اللَّهِ وَلَا أَن تَنكِحُوا أَزْوَاجَهُ مِن بَعْدِهِ أَبَدًا ۚ إِنَّ ذَٰلِكُمْ كَانَ عِندَ اللَّهِ عَظِيمًا ﴿٥٣﴾
މާނައީ: އޭ إيمان ވެއްޖެ މީސްތަކުންނޭވެ! ތިޔަބައިމީހުންނަށް ކެއުމަކަށް إذن ދެއްވުމުން މެނުވީ، އަދި އެ ކެއުން ތައްޔާރުވެއްޖައުމަށް ދާނދެން، انتظار ކުރުމަކާ ނުލައި، ނަބިއްޔާގެ ގޭގެއަށް ތިޔަބައިމީހުން ނުވަންނާށެވެ! އެހެނެއްކަމަކު ތިޔަބައިމީހުންނަށް ގޮވައިލައްވައިފިނަމަ، ފަހެ، ތިޔަބައިމީހުން ވަންނާށެވެ! އަދި ތިޔަބައިމީހުން ކައި އަވަދިވެއްޖެނަމަ، ފަހެ، ތިޔަބައިމީހުން ދާށެވެ! އަދި ވާހަކަ ދެއްކުމުން މުނިފޫހިފިލުވާ ގޮތުގައި ތިޔަބައިމީހުން ނުތިބޭށެވެ! (އެހެނީ) ހަމަކަށަވަރުން، ތިޔަބައިމީހުންގެ އެކަމަކީ، ނަބިއްޔާއަށް އުނދަގޫދޭ ކަމެއްކަމުގައިވެތެވެ. އަދި އެކަމުގެ ސަބަބުން ތިޔަބައިމީހުންދެކެ އެކަލޭގެފާނު ލަދުފުޅުގަނެތެވެ. حق ގޮތް بيان ކުރެއްވުމަށް اللَّه ލަދުވެތިވެވޮޑިއެއްނުގަންނަވަތެވެ. އަދި އެކަނބަލުން (އެބަހީ: ނަބިއްޔާގެ އަނބިއަނބިކަނބަލުން) ގެ ކިބައިން ތިޔަބައިމީހުން އެއްޗަކަށް އެދޭނަމަ، ފަހެ، ފަރުދާއެއްގެ އަނެއްފަރާތުން ތިޔަބައިމީހުން އެކަނބަލުންނާ سؤال ކުރާށެވެ! ތިޔަބައިމީހުންގެ ހިތްތަކަށާއި، އެކަނބަލުންގެ ހިތްޕުޅުތަކަށް އެންމެ طاهر ކަންބޮޑީ އެގޮތެވެ. اللَّه ގެ رسول އާއަށް ތިޔަބައިމީހުން އުނދަގޫ ކުރުމެއް، އަދި އެކަލޭގެފާނަށްފަހު ދުވަހަކުވެސް އެކަލޭގެފާނުގެ އަނބިއަނބިކަނބަލުންނާ ކާވެނިކުރުމެއް ތިޔަބައިމީހުންނަކަށް ހުއްދަވެގެނެއް ނުވެތެވެ. ހަމަކަށަވަރުން، އެކަމަކީ، اللَّه ގެ حضرة ގައި ބޮޑުވެގެންވާ ކަމެއްކަމުގައި (އެބަހީ: ފާފައެއްކަމުގައި) ވެއެވެ. (53)"
އަދި މާތްﷲ މި ސޫރަތުގެ 59 ވަނަ އާޔަތުގައިވެސް މިކަމަށް އިޝާރާތްކުރައްވާފައިވެއެވެ.
يَا أَيُّهَا النَّبِيُّ قُل لِّأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِن جَلَابِيبِهِنَّ ۚ ذَٰلِكَ أَدْنَىٰ أَن يُعْرَفْنَ فَلَا يُؤْذَيْنَ ۗ وَكَانَ اللَّهُ غَفُورًا رَّحِيمًا ﴿٥٩﴾
މާނައީ: އޭ ނަބިއްޔާއެވެ! ކަލޭގެފާނުގެ އަނބިއަނބިކަނބަލުންނާއި، ކަލޭގެފާނުގެ ދަރިދަރިކަނބަލުންނާއި، مؤمن ންގެ އަންހެނުން، އެކަނބަލުންގެ ފޭރާންތަކުން ނިވައިވެތިބުމަށް ކަލޭގެފާނު އެކަނބަލުންނަށް ވިދާޅުވާށެވެ! އެކަނބަލުން އެނގިގެން ވުމަށާއި، އެކަނބަލުންނަށް އުނދަގޫ ނުލިބުމަށް އެގޮތް މާގާތްކަން ބޮޑެވެ. اللَّه އީ، ގިނަގިނައިން ފާފަފުއްސަވާ، رحيم ވަންތަ ރަސްކަލާނގެ ކަމުގައި ވޮޑިގެންވެއެވެ. (59)"
