ދިވެހިރާއްޖޭގެ ޝަރުޢީ ދާއިރާއަށް ޚިދުމަތް ކުރައްވަމުން ގެންދެވި ބޭފުޅެއް ކަމަށްވާ، ހައިކޯޓުގެ ފަނޑިޔާރު އަލްއުސްތާޛު މުޙައްމަދު ފައިސަލް އެ މަޤާމުން އިސްތިއުފާދެއްވައިފިއެވެ. އެ މަނިކުފާނު އިސްތިއުފާދެއްވީ ކޮން ދުވަހަކު ކަމެއްގެ ތަފްޞީލެއް ހައިކޯޓުން ހާމަކޮށްފައެއް ނުވެއެވެ.
ފަނޑިޔާރު އަލްއުސްތާޛު މުޙައްމަދު ފައިސަލް އިސްތިއުފާދެއްވުމާ ގުޅިގެން، ހައިކޯޓުގެ ނަމުގައި އެ ކޯޓުން ވަނީ، އެ މަނިކުފާނު ކޮށްދެއްވާފައިވާ އަގުހުރި ޚިދުމަތްތަކަށް ޝުކުރު އަދާކޮށްފައެވެ. ހައިކޯޓުން ފާހަގަކުރައްވާފައިވާ ގޮތުގައި، ފަނޑިޔާރު ފައިސަލްގެ ޚިދުމަތްތަކަކީ ޤައުމީ ފެންވަރުގައި ވަރަށް ބޮޑު އަހައްމިއްޔަތުކަމެއް ދެވޭނެ ޚިދުމަތްތަކެކެވެ.
ފަނޑިޔާރު ފައިސަލް ވަނީ ހައިކޯޓުގެ ފަނޑިޔާރުކަމުގެ އިތުރުން ޝަރުޢީ ދާއިރާގެ އެކި މަޤާމުތަކުގައި ޚިދުމަތް ކުރައްވާފައެވެ. އެގޮތުން، އެ މަނިކުފާނު ވަނީ ޖުޑީޝަލް ސަރވިސް ކޮމިޝަން (ޖޭއެސްސީ) ގެ މެންބަރުކަމާއި، އެ ކޮމިޝަންގެ ނާއިބު ރައީސްކަމުގެ މަޤާމުތައް ވެސް ފުރުއްވާފައެވެ. މީގެ އިތުރުން، އެ މަނިކުފާނަކީ ޤާނޫނީ ވަކީލެއްގެ ގޮތުގައި ދިވެހިރާއްޖޭގެ ޝަރުޢީ ކޯޓުތަކުގައި ވަކާލާތު ކުރެއްވުމުގެ ތަޖުރިބާ ވެސް ލިބިފައިވާ ބޭފުޅެކެވެ.
ހައިކޯޓު ހިންގެވުން ވަގުތީ ގޮތުން 19 މާރިޗު 2025 ވަނަ ދުވަހުން ފެށިގެން، 19 ނޮވެންބަރު 2025 ވަނަ ދުވަހާއި ހަމައަށް ހަވާލު ކުރައްވާފައިވަނީ ވެސް ފަނޑިޔާރު އަލްއުސްތާޛު މުޙައްމަދު ފައިސަލްއާއެވެ. މި އިސްތިއުފާއާއެކު، ހައިކޯޓުގެ ފަނޑިޔާރުންގެ ބެންޗަށް ބަދަލެއް އަންނާނެއެވެ.
