މިލަދުންމަޑުލު ދެކުނުބުރީ ނ. ހޮޅުދޫގެ ރައްޔިތުންނަށް ސިއްޙީގޮތުން ލުއިފަސޭހަ ވާނެ މުހިންމު ފިޔަވަޅެއްގެ ގޮތުން، އެރަށު ސިއްޙީ މަރުކަޒުގައި އެކްސްރޭގެ ޚިދުމަތް ރަސްމީކޮށް ފަށައިފިއެވެ. މި ޚިދުމަތް ފެށުމަކީ ރަށުގެ ރައްޔިތުންނަށް ބޭނުންވާ މެޑިކަލް އިމޭޖިންގ ޚިދުމަތް ލޯކަލް ފެންވަރުގައި ލިބިގެންދާނެ ކަމެކެވެ.
މި ޚިދުމަތް ރަސްމީކޮށް އިފްތިތާހުކޮށްދެއްވީ ސިއްޙީ ވަޒީރު އަބްދުﷲ ނާޠިމް އިބްރާހީމްއެވެ. ވަޒީރު ނާޠިމް މި ޚިދުމަތް އިފްތިތާހުކޮށްދެއްވީ ނ. އަތޮޅުގެ މީހުން ދިރިއުޅޭ ރަށްތަކަށް ކުރައްވާ ރަސްމީ ދަތުރުފުޅުގެ ތެރެއިން މިއަދު ހޮޅުދޫއަށް ކުރެއްވި ޒިޔާރަތުގައެވެ.
ނ. ހޮޅުދޫގެ ސިއްޙީ މަރުކަޒުގައި އެކްސްރޭގެ ޚިދުމަތް ރަސްމީކޮށް ފެށުމަށްޓަކައި މިއަދު އެރަށުގައި ވަނީ ހާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި ހޮޅުދޫ ކައުންސިލްގެ ރައީސްއާއި، ކައުންސިލް އިދާރާގެ މެމްބަރުންނާއި، އެރަށު ސިއްޙީ މަރުކަޒުގައި މަސައްކަތް ކުރާ ފަރާތްތަކުގެ އިތުރުން ސިއްޙީ ވުޒާރާގެ އިސް އޮފިޝަލުންވެސް ބައިވެރިވެ ވަޑައިގެންނެވިއެވެ.
ރާއްޖޭގެ ރަށްރަށުގައި ސިއްޙީ ޚިދުމަތްތައް އިތުރަށް ފުޅާކޮށް، ރައްޔިތުންނަށް ފަސޭހަކޮށްދިނުމަށް ސަރުކާރުން ކުރައްވާ މަސައްކަތްތަކުގެ ތެރެއިން، ހޮޅުދޫގައި އެކްސްރޭގެ ޚިދުމަތް ފެށިގެން ދިއުމަކީ އެ އަތޮޅުގެ ސިއްޙީ ދާއިރާއަށް ލިބުނު ބޮޑު ކުރިއެރުމެއް ކަމަށް ސިއްޙީ ވުޒާރާއިން ވިދާޅުވެއެވެ.
