ސްރީލަންކާއަށް ދިމާވެފައިވާ ކާރިސީ ޙާލަތުގައި އެޤައުމަށް އެހީތެރިކަން ފޯރުކޮށްދިނުމަށް، ދިވެހި މީޑިއާތަކުން ފެށި ޚާއްސަ ޓެލެތޯނަށް މިހާތަނަށް 8 ލައްކައަށްވުރެ ގިނަ ރުފިޔާ ލިބިއްޖެއެވެ.
މި ޓެލެތޯން ފެށީ މިއަދު ހެނދުނު 9 ޖެހިއިރުއެވެ. މި ޓެލެތޯން ކުރިއަށްދާނީ މިއަދު ހެނދުނު 9 އިން ފެށިގެން މިރޭ މެންދަމު 1 ޖެހުމާ ހަމައަށެވެ.
“ސިލޯނާއެކު ދިވެހީން” ގެ ނަމުގައި ކުރިއަށްގެންދާ މި ޓެލެތޯނުގެ މަޤްޞަދަކީ، މިވަގުތު ސްރީލަންކާއަށް ދިމާވެފައިވާ އިޤްތިޞާދީ އަދި އިންސާނީ ކާރިސާގައި އެޤައުމުގެ ރައްޔިތުންނަށް އެހީތެރިކަން ފޯރުކޮށްދިނުމެވެ. މި ޓެލެތޯންގައި ރާއްޖޭގެ ގިނަ މީޑިއާތަކުން ބައިވެރިވެ، ސްރީލަންކާގެ ޙާލަތު ދައްކުވައިދީ، އެހީއަށް އެދި ދިވެހި ރައްޔިތުންނަށް ގޮވާލަމުންދެއެވެ.
މިހާތަނަށް ލިބިފައިވާ ތަފާސްހިސާބުތަކަށް ބަލާއިރު، ބީއެމްއެލްއިން މި ޓެލެތޯންއަށް ޚާއްސަކޮށްފައިވާ ދިވެހި ރުފިޔާ އެކައުންޓަށް ވަނީ 8 ލައްކައަށްވުރެ ގިނަ ރުފިޔާ ޖަމާކުރެވިފައެވެ. މީގެ އިތުރުން، ޑޮލަރު އެކައުންޓަށް ވެސް ވަނީ ގިނަ އަދަދެއްގެ ފައިސާ ޖަމާކުރެވިފައެވެ. އެގޮތުން، ޑޮލަރު އެކައުންޓަށް 1500 އަށްވުރެ ގިނަ ޑޮލަރު ލިބިފައިވާކަމަށް މައުލޫމާތު ލިބެއެވެ.
މި ޓެލެތޯނަށް ލިބެމުންދާ ބޮޑު ތަރުހީބަކީ، ދިވެހި ރައްޔިތުންގެ ހިތްތަކުގައި އަވަށްޓެރި ޤައުމަށްޓަކައި އޮތް ހެޔޮ އެދުމާއި އެއްބައިވަންތަކަން ރަމްޒުކޮށްދޭ ކަމެކެވެ.
