އެއިޑްސް ބަލީގެ ރިސްކުތަކާ ދެކޮޅަށް މަސައްކަތްކުރުމުގައި ވިލުންތެރިކަމާއި އީޖާދީ ހޯދުންތަކުގެ މުހިންމުކަން ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު، ފާހަގަކުރައްވައިފިއެވެ. އެކަމަނާ ވިދާޅުވީ، މި ބައްޔާ ދެކޮޅަށް ކުރާ މަސައްކަތުގައި ގުޅިގެން މަސައްކަތްކުރުން މުހިންމު ކަމަށެވެ.
މީސްމީޑިޔާގައި ޙިއްސާކުރެއްވި ޕޯސްޓެއްގައި ފަސްޓް ލޭޑީ ސާޖިދާ މުޙައްމަދު ވިދާޅުވީ، ދުނިޔޭގެ އެއިޑްސް ދުވަސް ފާހަގަކުރާއިރު، އެއިޑްސް ބަލީގެ ރިސްކުތަކާ ދެކޮޅަށް މަސައްކަތްކުރުމުގައި ވިލުންތެރިކަމާއި އީޖާދީ ހޯދުންތަކާއެކު ގުޅިގެން މަސައްކަތްކުރުމަށް ގޮވާލައްވާ ކަމަށެވެ. އެކަމަނާ ފާހަގަކުރެއްވި ގޮތުގައި، އެއިޑްސް ބަލިން ރައްކާތެރިވުމަށް ރާއްޖޭގެ އެކި ކަންކޮޅުތައް ހޭލުންތެރިކޮށް، މި ބައްޔާ ދެކޮޅަށް ރައްޔިތުން ބާރުވެރިކުރެވޭނީ ހަމައެކަނި ގުޅިގެން ކުރާ މަސައްކަތުންނެވެ.
މީގެ އިތުރުން، އެއިޑްސް ބައްޔަށް ހޭލުންތެރިވެ، ކޮންމެ ރައްޔިތަކަށްވެސް ފަރުވާދެވޭކަން ކަށަވަރުކުރެވޭ މާޙައުލެއް ޤާއިމުކުރުމަށް ގުޅިގެން މަސައްކަތްކުރުމަށް ފަސްޓް ލޭޑީ ވަނީ އިލްތިމާސްކުރައްވާފައެވެ. މިކަމަށްޓަކައި ހުރިހާ ފަރާތްތަކެއްގެ ބައިވެރިވުން މުހިންމު ކަމަށް އެކަމަނާ ވިދާޅުވިއެވެ.
ފަސްޓް ލޭޑީ ވިދާޅުވީ، ހުރިހާ އެންމެންގެ ވެސް ބައިވެރިވުމާއެކު އދ.ން ކަނޑައަޅާފައިވާ ލަނޑުދަނޑިއާ އެއްގޮތަށް 2030 ވަނަ އަހަރުގެ ނިޔަލަށް ދުނިޔެއިން އެއިޑްސް ބަލި ނައްތާލެވިދާނެ ކަމުގެ އުންމީދު އެބަހުރި ކަމަށެވެ. އެހެންކަމުން، މި ބޮޑު މަޤްސަދު ޙާސިލުކުރުމަށްޓަކައި އެންމެން ގުޅިގެން މަސައްކަތްކުރުމަށް އެކަމަނާ ވަނީ ބާރުއަޅުއްވާފައެވެ.
