ފުވައްމުލަކު ސިޓީގެ ރައްޔިތުންނަށް ދިމާވި ފެނުގެ ދަތިކަމާ ގުޅިގެން، މިދިޔަ މަހުގެ ފެން ބިލުގެ ފައިސާ ނުނަގާ ގޮތަށް ފެނަކަ ކޯޕަރޭޝަން (ފެނަކަ) އިން ނިންމަވައިފިއެވެ. މި ނިންމެވުމަކީ، ފެނުގެ ޚިދުމަތް މެދުކެނޑި، ރައްޔިތުންނަށް ދިމާވި ދަތިތަކަށް ލުޔެއް ދިނުމުގެ ގޮތުން ނިންމެވުނު ނިންމެވުމެކެވެ.
ފެނަކަ ކޯޕަރޭޝަނުން މިކަމާ ގުޅިގެން ނެރުއްވި ބަޔާނެއްގައި ވިދާޅުވީ، ފުވައްމުލަކު ސިޓީއަށް ދިމާވެފައިވާ ފެނުގެ މައްސަލަ ޙައްލުކޮށް، ރަނގަޅު ފެންވަރެއްގައި ފެނުގެ ޚިދުމަތް އަލުން ދިނުމަށްޓަކައި ކުރަންޖެހޭ އެންމެހައި ކަންކަން ހުއްޓުމެއްނެތި ކުރަމުންދާ ކަމަށެވެ. ފުވައްމުލަކުގެ ފެނުގެ ޚިދުމަތް ދޭ ނެޓްވޯކް އަޕްގްރޭޑް ކުރުމުގެ މަސައްކަތް ކުރަމުންދާތީ، ވޭތުވެދިޔަ ދުވަސްތަކުގައި އެކި ވަގުތުތަކުގައި ފެން ކެނޑުމާއި، ފެނުގެ ޕްރެޝަރ ދަށްވުން ފަދަ ކަންކަން މެދުވެރިވި ކަމަށް ފެނަކައިން ފާހަގަކުރެއްވިއެވެ.
ފެނަކައިން ވިދާޅުވީ، ފުވައްމުލަކުގެ ފެނުގެ ނިޒާމު އަޕްގްރޭޑް ކުރުމުގެ މަސައްކަތް މިހާރުވެސް ކުރިއަށްދާ ކަމަށެވެ. އަދި ފެނުގެ ޚިދުމަތް މެދުކެނޑި ދިމާވި ދަތި ވަގުތުތަކުގައިވެސް ރައްޔިތުންގެ ފަރާތުން ލިބުނު އެއްބާރުލުމާއި އެހީތެރިކަމަށް ފެނަކައިން ވަނީ ޝުކުރު އަދާކުރައްވާފައެވެ. މި މަސައްކަތް ނިމުމުން ފުވައްމުލަކު ސިޓީގެ ރައްޔިތުންނަށް ދެމުންގެންދާ ފެނުގެ ޚިދުމަތުގެ ފެންވަރު އިތުރަށް ރަނގަޅުވެގެންދާނެ ކަމަށް ބެލެވެއެވެ.
