ފަތުރުވެރިކަމާއި ތިމާވެށްޓާ ބެހޭ ވުޒާރާއިން ހާމަކުރައްވާފައިވާ ގޮތުގައި، "މަގޭ ސޯލާ" ޕްރޮގްރާމްގެ ދަށުން މިއަހަރު ތެރޭގައި ޖުމްލަ 783 ކިލޯވޮޓުގެ ސޯލާ ޕީވީ ނިޒާމު ވަނީ ގޭބީސީތަކުގައި ހަރުކޮށްފިއެވެ. މި ޕްރޮގްރާމަކީ އިރުގެ އަލިން ކަރަންޓު އުފައްދާ ނިޒާމުތައް ބޭނުންކުރުމުގެ ފުރުސަތު ރައްޔިތުންނަށް ފަހިކޮށްދިނުމަށް ހިންގާ ގައުމީ މުހިންމު މަޝްރޫއެކެވެ.
މަގޭ ސޯލާ ޕްރޮގްރާމުގެ ޢަމަލީ މަސައްކަތް ފަށްޓަވައިދެއްވީ މިއަހަރުގެ ޖަނަވަރީ މަހުގެ ތެރޭގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. އެންމެ ފުރަތަމަ މި ސިސްޓަމް ހަރުކުރެވުނީ ހއ. ފިއްލަދޫގައެވެ. މި ޕްރޮގްރާމުގެ މައިގަނޑު މަޤްޞަދުތަކުގެ ތެރޭގައި ކަރަންޓު ބިލަށް ކުރާ ހޭދަ ކުޑަކުރުމާއި، ތެލުން އުފައްދާ ހަކަތަ ރާއްޖޭގައި ބޭނުންކުރާ މިންވަރު މަދުކުރުން ހިމެނެއެވެ. މިއީ ދިވެހިރާއްޖެ ތިމާވެއްޓާ ރައްޓެހި ހަކަތައަށް ބަދަލުވުމަށް ކުރާ މަސައްކަތުގައި ލިބުނު ބޮޑު ކުރިއެރުމެކެވެ.
ވުޒާރާއިން ދެއްވާފައިވާ މައުލޫމާތުތަކަށް ބަލާއިރު، މި ޕްރޮގްރާމުގެ ފުރަތަމަ ފިޔަވަހީގެ ދަށުން މިއަހަރު ތެރޭގައި ޖުމްލަ 783 ކިލޯވޮޓުގެ ސޯލާ ޕީވީ ނިޒާމު ވަނީ ރާއްޖޭގެ 10 އަތޮޅެއްގެ ގޭބިސީތަކުގައި ކާމިޔާބުކަމާއެކު ހަރުކޮށްފައެވެ. މިކަމުގެ ސަބަބުން މިހާރުވެސް އެތައް ގޭބިސީއަކަށް ކަރަންޓު ބިލުން ބޮޑު ލުއިކަމެއް ލިބިގެންދާނެއެވެ.
މި ޕްރޮގްރާމް އިތުރަށް ފުޅާކުރުމަށްޓަކައި ގިނަ މަސައްކަތްތަކެއް މިހާރުވެސް ދަނީ ކުރިއަށެވެ. ފަތުރުވެރިކަމާއި ތިމާވެށްޓާ ބެހޭ ވުޒާރާއިން ވިދާޅުވީ، ގޭބިސީތަކަށް އަމާޒުކޮށްގެން އިތުރު 1.5 މެގަވޮޓުގެ ސޯލާ ޕީވީ ސިސްޓަމް ސަޕްލައިކޮށްދޭނެ ފަރާތެއް ހޯދުމަށް މިހާރު ވަނީ އިޢުލާންކޮށްފައިވާ ކަމަށެވެ. މީގެއިތުރުން، އިތުރު 7 މެގަވޮޓުގެ ސޯލާ ޕީވީ ސިސްޓަމް ފޯރުކޮށްދޭނެ ފަރާތެއް ހޯދުމަށް ބީލަމަށް ހުޅުވާލުމުގެ މަސައްކަތްވެސް މިހާރު ދަނީ ކުރިއަށްކަމަށް އެ ވުޒާރާއިން ބަޔާންކުރެއްވިއެވެ. މި މަސައްކަތްތައް ނިމުމުން ރާއްޖޭގައި ސޯލާ ހަކަތަ ބޭނުންކުރާ މިންވަރު އިތުރަށް ބޮޑުވެގެންދާނެއެވެ.
