ސިޔާސީ ޕާޓީތަކުގެ މެންބަރުންނަށް ޕާޓީން ވަކިވުމުގެ ކަންކަން ވަގުތުން ކުރެވޭނެ އިންތިޒާމެއް އަންނަ އަހަރުގެ ޖެނުއަރީ މަހުގެ 1 ވަނަ ދުވަހުން ފެށިގެން ހަމަޖައްސަން އިލެކްޝަންސް ކޮމިޝަން (އީސީ) އިން ނިންމައިފިއެވެ. މި ބަދަލާއެކު ޕާޓީގެ ދަފްތަރުން ވަކިވުމުގެ ކަންކަން އިތުރަށް ހަލުވިވެގެންދާނެއެވެ.
އީސީން ވިދާޅުވެފައިވާ ގޮތުގައި، އަންނަ އަހަރުގެ ޖެނުއަރީ މަހުގެ އެއްވަނަ ދުވަހުން ފެށިގެން އެ ކޮމިޝަނުގެ ޕޯޓަލް މެދުވެރިކޮށް ޕާޓީތަކުން ވަގުތުން ވަކިވެވޭ ގޮތަށް ބަދަލު ގެނައުމަށް ވަނީ ނިންމާފައެވެ. މިހާރު އެ ކޮމިޝަނުން ސިޔާސީ ޕާޓީގެ ދަފްތަރުން މެންބަރަކު ވަކިކުރަނީ، ކޮމިޝަނުގެ ޕޯޓަލް މެދުވެރިކޮށް ހުށަހެޅުމުން 14 ދުވަހުގެ ތެރޭގައެވެ.
ނަމަވެސް، މި ބަދަލުތައް ގެނައި ނަމަވެސް ސިޔާސީ ޕާޓީތަކުގެ އިސް މަޤާމުތަކުގައި ތިއްބަވާ ބޭފުޅުން ޕާޓީން ވަކިވާން އެދޭ ހާލަތުގައި ވަގުތު ނަގާނެ ކަމަށް އީސީން ވަނީ ހާމަކުރައްވާފައެވެ. އީސީގެ އޮފިޝަލެއް ކަމަށްވާ ސަލާހު ވިދާޅުވީ، ޕާޓީގެ އިސް މަޤާމުތަކުގައި ތިއްބަވާ ފަރާތްތައް ވަކިވުމަށް ވަގުތު ނަގާނެ ސަބަބުތަކެއް ހުރި ކަމަށެވެ.
އެގޮތުން ޕާޓީގެ ޗެއަރޕާސަނާއި، ރައީސާއި، ހަޒާންދާރާއި، ރަޖިސްޓްރާ ފަދަ މަޤާމުތަކަކީ ކޮމިޝަނުގެ ރެކޯޑުގައި ހިމެނެންޖެހޭ ބަޔަކަށްވާތީ، އެފަދަ ބޭފުޅުން ވަކިވުމަށް އެދި ހުށަހެޅުމުން ވަގުތު ނަގާނެ ކަމަށް ސަލާހު ވިދާޅުވިއެވެ. މި ބަދަލުގެ ސަބަބުން ސިޔާސީ ޕާޓީތަކުގެ ދަފްތަރު ބެލެހެއްޓުމުގެ މަސައްކަތް އިތުރަށް ފަސޭހަވެ، މެންބަރުންނަށް ލުއިފަސޭހަ ގޮތްތަކެއް ލިބިގެންދާނެ ކަމަށް ބެލެވެއެވެ.
