ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭގައި އިމާރާތްކޮށްފައިވާ 4،000 ފްލެޓް ލިބުނު މީހުންނަށް އެތަނުގެ އިތުރު ފަސް ޓަވަރަކުން ފްލެޓްތައް ހަވާލުކުރަން ފަށައިފި އެވެ. މިއީ އެފްޑީސީގެ ބިޔަ ހައުސިންގ ޕްރޮޖެކްޓްގެ ދަށުން ފްލެޓްތައް ލިބޭ ފަރާތްތަކަށް ގެދޮރު ހަވާލުކުރުމުގެ މަސައްކަތް އިތުރަށް ހަލުވިކުރުމުގެ ގޮތުން ފެށި މަސައްކަތެކެވެ.
މިފަހަރު ފްލެޓް ހަވާލުކުރަން ފަށާފައިވަނީ 11، 12، 13، 15 އަދި 16 ވަނަ ޓަވަރުގެ ފްލެޓްތަކެވެ. މީގެ ކުރިން 14 ވަނަ ޓަވަރުން ފްލެޓް ލިބުނު މީހުންނަށް ތަޅުދަނޑި ހަވާލުކުރުމުގެ މަސައްކަތް ވަނީ ފަށާފަ އެވެ. އެފްޑީސީން ބުނި ގޮތުގައި، މި ފަސް ޓަވަރުގެ ތެރެއިން ކޮންމެ ޓަވަރެއްގައި 120 ފްލެޓް ހިމެނެ އެވެ. އެހެންކަމުން މި ފަސް ޓަވަރުން ޖުމްލަ 600 ފްލެޓް ހަވާލުކުރެވޭނެ އެވެ.
ފްލެޓްތައް ހަވާލުކުރުމުގެ މަސައްކަތް ކުރިއަށްދާނެ ގޮތާ ބެހޭ ގޮތުން އެފްޑީސީން މައުލޫމާތު ދެމުން ބުނީ، ކޮންމެ ދުވަހަކު ވެސް ހެނދުނު 9:30 އިން މެންދުރު ފަހު 3:30 އަށް މި މަސައްކަތް ކުރިއަށްދާނެ ކަމަށެވެ. މިގޮތަށް ގެދޮރު ހަވާލުކުރުމުގެ މަސައްކަތް ބާރަށް ކުރިއަށް ގެންދިއުމަކީ، 4،000 ފްލެޓް ލިބުނު ގިނަ އަދަދެއްގެ ރައްޔިތުންނަށް ލިބޭނެ ހިތްހަމަޖެހުމެކެވެ.
މި ޕްރޮޖެކްޓަކީ ރައްޔިތުންނަށް ދިރިއުޅުމަށް ބޭނުންވާ ގެދޮރު ފޯރުކޮށްދިނުމަށް ސަރުކާރުން ކުރިއަށް ގެންދާ އެންމެ ބޮޑު އެއް މަޝްރޫއެވެ. ފްލެޓްތައް ހަވާލުކުރުމުގެ މަސައްކަތް މިހާރު މިވަނީ އެކި ފިޔަވައްސަށާއި އެކި ޓަވަރުތަކަށް ބަހާލައިގެން ކުރިއަށް ގެންދަން ފަށާފަ އެވެ.
