ނަމާދުކުރުމަކީ ހިތްހަމަޖެހުން ލިބޭ ކަމެއް ކަމަށް ބުނާއަޑު އަހަމެވެ. އެހެންވީމާ ހިތްހަމަޖެހުން ހޯދަން ނަމާދުކުރެވިދާނެތޯ؟
ކިޔުންތެރިޔާއަށް ބުނެލަން އޮތީ މުސްލިމުން ނަމާދުކުރަންވީ އެއީ އަދާކުރަންޖެހޭ ފަރުޟަކަށްވާތީއެވެ. ނަމާދުނުކޮށް ހުރުމަކީ ދީނުން ބޭރުވާނެ ކަމެކެވެ. ޤަޞްދުގައި ނަމާދުއަޅާ މީހާއެހުންނަނީ ދީނުން ބޭރުވެގެންނެވެ. "އަޅާއާއި އިސްލާމްކަމާއި ދެމެދުގައިވަނީ ނަމާދު އަޅައިފުމެވެ."
އެއްވެސް ޝައްކެއް ނެތެވެ. ނަމާދުކުރާ މީހަކަށް ﷲ ތަޢާލާ ހިތްހަމަޖެހުން ދެއްވަވާނެތެވެ. ޘާބިތުކަންވެސް ދެއްވަވާނެތެވެ. ގިނަ ގޮތްގޮޕތުން ރަޙްމަތް ލައްވަވާނެތެވެ. ނަމާދުކުރުމާއި އުފާވެރިކަން ލިބުމާއި ހުރި ގުޅުން ތިރީގައިވާ ލިޔުމުން އެނގިލައްވާނެތެވެ. އިން ޝާ ﷲ
އެއީ ޢުމުރުން 23 އަހަރުގެ އަންހެނެކެވެ. އޭނާގެ އެކުވެރިންގެ ތެރޭގައި މުސްލިމް 2 އަންހެނުން ތިބެއެވެ. އެ 2 އެކުވެރިންނަކީ ވަޒީފާގައި އުޅެމުންވެސް ޤަވާއިދުން ނަމާދުކުރާ 2 އަންހެނުންނެވެ.
އެ 2 އެކުވެރިން ނަމާދުކުރަން އެހައި ބޮޑަށް ސަމާލުކަންދޭތީ ނަމާދުކުރީމާ ވާގޮތެއް ބައިލުމުގެ ބޭނުމުގައި މުސްލިމުން ފަދައިން ހެދުން އަޅައިގެން އެމީހުންނާއިއެކު އޭނާ ނަމާދެއް ކުރިއެވެ.
ނަމާދުކުރުން ވެގެން ދިއައީ އޭނާއަށް ވަރަށް ބޮޑު ހިތްހަމަޖެހުމެއް ލިބުނު ކަމަކަށެވެ. އެހެންވެ ކޮންމެ ފަހަރަކު އެކުވެރިންނާއިއެކު ނަމާދުކުރަން ފެށިއެވެ.
ނަތީޖާ އެނގޭހެއްޔެވެ؟ އިސްލާމް ދީން އުނގެނެން ޝައުޤުވެރިވެ ޤުރްއާނުގެ މާނަ ކިޔައި މަޢުލޫމާތު އޮޅުންފިލުވައިގެން އިސްލާމްވީއެވެ. އިސްލާމްވެ ޙަޤީޤީ މާނައިގައި ނަމާދުކުރާ އަންހެނަކަށް ބަދަލުވީއެވެ.
އޭނާ ބުނާ ގޮތުން ކަންކަން އެގޮތަށް ބަދަލުވެގެން ދިއައީ ކުރި ފުރަތަމަ ނަމާދާއިއެކު ލިބުނު ހިތްހަމަޖެހުން ބޮޑުކަމުންނެވެ. ހިތުގައި ހުރި ހުރިހާ ކަންބޮޑުވުންތަކެއް ފިލައިގެން ދިއުމުންނެވެ. އަމިއްލަ ނަފްސަށް އިތުބާރު ބޮޑުވެ ހިތްވަރު ލިގިގެންދިއައީތީއެވެ.
މީސްތަކުންނޭވެ! މިހުންނަނީ ނަމާދުގެ ހުރި ފައިދާތަކެވެ. އޭނާ އިސްލާމް ނުވެ ހުރެ ކުރި ނަމާދަކީ އަޞްލު ނަމާދަކަށްވެސް ނުވާނެއެވެ. އެކަން ވާނީ އޭނާ ކުރި ޙަރަކާތްތަކަކަށެވެ. އެހެނަސް އޭނާއަށް ލިބިގެންދިއަ ބޮޑު ފައިދާ ނިކަން ދެކި ބަލާށެވެ!
އަހުރެމެންނަކީ މުސްލިމުންނެވެ. އަހުރެމެންނަށް މިއުޅެނީ ނަމާދުކުރަންވާ ގޮތަށް ނަމާދެއް ކޮށްނުލެވިގެންނެވެ. ޚުޝޫޢަތްތެރިކަމާއިއެކު ނަމާދެއް ކޮށްލެވިއްޖެނަމަ ކުރާނެ ބޮޑު ފައިދާ ނިކަން ދެކިބަލާށެވެ!
- އިސްލާމީ ތިލަފަތުގެ ދަރުސަކުން
