ދިވެހިރާއްޖޭގެ ހައި ކޯޓުގެ ފަނޑިޔާރު އަލްއުސްތާޛް މުޙައްމަދު ނިޔާޒް، ޝަރަފުވެރިކަމާއެކު ފަނޑިޔާރުކަމުގެ މަގާމުން މިއަދު ރިޓަޔަރ ކުރައްވައިފިއެވެ. 23 އަހަރު ދުވަހުގެ ދިގު ޖުޑީޝަލް ޚިދުމަތަކަށްފަހު އޭނާ ރިޓަޔަރ ކުރެއްވިއިރު، ފަނޑިޔާރު ނިޔާޒަކީ ހައިކޯޓުގައި ހުންނެވި އެންމެ ގިނަ ދުވަސްވީ ފަނޑިޔާރެވެ.
މިކަން ހައި ކޯޓުން ކަށަވަރުކޮށްދެއްވާފައިވަނީ އެ ކޯޓުގެ ރަސްމީ ސޯޝަލް މީޑިއާ އެކައުންޓް މެދުވެރިކޮށެވެ. ހައި ކޯޓުން ނެރުނު މެސެޖެއްގައި ބުނެފައިވަނީ ފަނޑިޔާރު ނިޔާޒް، ޝަރަފުވެރިކަމާއެކު ފަނޑިޔާރުކަމުގެ މަގާމުން ވަކިވެވަޑައިގެންނެވީ މިއަދު ކަމަށެވެ. އަދި ދިވެހިރާއްޖޭގެ ޢަދުލު އިންސާފު ގާއިމުކުރުމަށް އޭނާ ކޮށްދެއްވާފައިވާ އަގުހުރި ޚިދުމަތްތަކަށް ވަނީ ޝުކުރު އަދާކުރައްވާފައެވެ.
ޢަދުލުގެ ދާއިރާގައި 23 އަހަރުގެ ތަޖުރިބާ ލިބިވަޑައިގެންފައިވާ ފަނޑިޔާރު ނިޔާޒު، ހައި ކޯޓާ ގުޅިވަޑައިގެންނެވީ 18 ޖެނުއަރީ 2018 ގައެވެ. އޭނާ ވަނީ ހައި ކޯޓުގައި އެންމެ ގިނަ ދުވަހު ޚިދުމަތް ކުރެއްވި ފަނޑިޔާރުގެ ޝަރަފު ހޯއްދަވާފައެވެ.
ހައި ކޯޓަށް ވަޑައިގަތުމުގެ ކުރިން ފަނޑިޔާރު ނިޔާޒު ވަނީ 2002 ވަނަ އަހަރުން ފެށިގެން ރާއްޖޭގެ އެކި ކަންކޮޅުތަކުގައި ޚިދުމަތް ކުރައްވާފައެވެ. އެގޮތުން، ވައިކަރަދޫ މެޖިސްޓްރޭޓް ކޯޓާއި ކުޅުދުއްފުށި މެޖިސްޓްރޭޓް ކޯޓުގައިވެސް އޭނާ ވަނީ ޚިދުމަތް ކުރައްވާފައެވެ. މީގެ އިތުރުން ހދ. ޖުޑީޝަލް ދާއިރާގެ އިސް މެޖިސްޓްރޭޓްކަން ވެސް ފަނޑިޔާރު ނިޔާޒު ވަނީ އަދާކުރައްވާފައެވެ.
