ޤަވާއިދާ ޚިލާފަށް މާލޭގައި ހިންގަމުން ދިޔަ ހަތަރު މަސާޖު ޕާލާއެއް މޯލްޑިވްސް އިމިގްރޭޝަންގެ ޓާސްކްފޯސްއިން ބަލައި ފާސްކޮށް، ޤަވާއިދާ ޚިލާފަށް އުޅުނު ފަސް ބިދޭސީން އެ އިދާރާގެ ބެލުމުގެ ދަށަށް ގެނެސްފިއެވެ.
މި އޮޕަރޭޝަނަކީ ރާއްޖޭގައި ޤަވާއިދާ ޚިލާފަށް ވިޔަފާރިކޮށް އަދި މަސައްކަތް ކުރަމުންދާ ބިދޭސީންނަށް އަމާޒުކޮށް ކުރިއަށް ގެންދިޔަ މަސައްކަތެކެވެ.
މޯލްޑިވްސް އިމިގްރޭޝަނުން މިކަން ހާމަކުރައްވަމުން ވިދާޅުވީ، ޓާސްކްފޯސްއިން ކުރިއަށް ގެންދިޔަ މި އޮޕަރޭޝަންގައި މާލޭގައި ހިންގަމުން ދިޔަ އިތުރު ހަތަރު މަސާޖު ޕާލަ ބަލައި ފާސްކޮށްފައިވާ ކަމަށެވެ. މި އޮޕަރޭޝަންގެ މައިގަނޑު މަޤްސަދަކީ ޤަވާއިދާ ޚިލާފަށް ރާއްޖޭގައި އުޅޭ ބިދޭސީން ދެނެގަނެ، އެފަދަ ތަންތަން ހުއްޓުވުމެވެ.
އެގޮތުން، މި އޮޕަރޭޝަންގެ ތެރެއިން ދޫކޮށްފައިވާ ހުއްދައިގެ ބޭރުން، ޤަވާއިދާ ޚިލާފަށް އުޅުނު ފަސް ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެނެސްފައެވެ. މި ބިދޭސީންނާ މެދު އިމިގްރޭޝަން ޤާނޫނާއި ޤަވާއިދުތަކާ އެއްގޮތަށް ފިޔަވަޅު އަޅާނެ ކަމަށް ލަފާކުރެވެއެވެ.
މިފަދަ ޚާއްސަ އޮޕަރޭޝަންތައް އިމިގްރޭޝަނުން ކުރިއަށް ގެންދަނީ، ރާއްޖޭގައި ޤަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށާއި، ޤާނޫނީ ހުއްދަ ނެތި ހިންގާ ވިޔަފާރިތައް ހުއްޓުވުމަށް ކަމަށް އިމިގްރޭޝަނުން ވަނީ ބުނެފައެވެ.
