އޮސްޓްރޭލިޔާގެ ސިޑްނީގައި ހުންނަ ބޮންޑީ ބީޗުގައި އިއްޔެ ދިން ނިރުބަވެރި ޙަމަލާ ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފިއެވެ. މި ޙަމަލާގައި އެތައް ބަޔަކު މަރުވެ އަދި ޒަޚަމުވެފައިވާކަމަށް ރިޕޯޓްތައް ބުނެއެވެ. ދިވެހި ސަރުކާރުން ވަނީ މި ހާދިސާގައި އޮސްޓްރޭލިޔާގެ ސަރުކާރާއި ރައްޔިތުންނަށް ތަޢުޒިޔާ އަދި އެއްބައިވަންތަކަން ފާޅުކޮށްފައެވެ.
ޚާރިޖީ ވުޒާރާއިން ނެރުނު ބަޔާނެއްގައި ވިދާޅުވީ، ބޮންޑީ ބީޗުގައި ތިބި އާންމުންނަށް އަމާޒުކޮށް ދިން މި ނިރުބަވެރި ޙަމަލާ އެންމެ ހަރުކަށި އިބާރާތުން ކުށްވެރިކުރައްވާ ކަމަށެވެ. ޚާރިޖީ ވުޒާރާގެ ބަޔާނުގައި ވާގޮތުން، މިފަދަ ލާއިންސާނީ ޢަމަލުތައް ކުށެއް ނެތް އެތައް ބަޔަކަށް ދިނުމަކީ އެއްވެސް މުޖުތަމަޢެއްގައި ބަލައިގަނެވޭނެކަމެއް ނޫނެވެ.
މި ހިތާމަވެރި ހާދިސާގައި ނިޔާވި މީހުންގެ ޢާއިލާތަކަށް ދިވެހި ސަރުކާރުން ވަނީ ތަޢުޒިޔާ ދަންނަވާފައެވެ. އަދި ޙަމަލާގައި ޒަޚަމުވި މީހުންނަށް އަވަސް ޝިފާއަކަށް އެދޭކަމަށް ވެސް ބަޔާނުގައި ވަނީ ފާހަގަކޮށްފައެވެ.
ޚާރިޖީ ވުޒާރާއިން އިތުރަށް ވިދާޅުވީ މި ހިތާމަވެރި ދަނޑިވަޅުގައި ދިވެހި ސަރުކާރާއި ރައްޔިތުން ތިބީ އޮސްޓްރޭލިޔާއާއެކު ކަމަށެވެ. އަދި ހުރިހާ ބާވަތެއްގެ ނިރުބަވެރި ހަރަކާތްތަކާ ދެކޮޅަށް ދިވެހި ސަރުކާރުން އަބަދުވެސް މަސައްކަތްކުރާނެކަން ބަޔާނުގައި ވަނީ ވަރަށް ބޮޑަށް ދިފާޢުކޮށްފައެވެ.
