ޤައުމީ އެއަރލައިން މޯލްޑިވިއަނުން ދިވެހިރާއްޖެއާއި އޮސްޓްރޭލިއާއާއި ދެމެދު ސީދާ ދަތުރުތައް ފެށުމަށް ތައްޔާރުވެއްޖެއެވެ. މިއީ ރާއްޖެއާއި އޮސްޓްރޭލިއާއާއި ދެމެދު ސީދާ ދަތުރުތައް ފަށާ ފުރަތަމަ ފަހަރުކަމަށް ވެގެންދާނެއެވެ. މި ދަތުރުތައް ފެށުމާއެކު ދެ ޤައުމުގެ ގުޅުން އިތުރަށް ބަދަހިވެ، ފަތުރުވެރިކަމުގެ ދާއިރާއަށް ބޮޑު ކުރިއެރުމެއް ލިބިގެންދާނެކަމަށް ބެލެވެއެވެ.
މޯލްޑިވިއަނުން މި ސީދާ ދަތުރުތައް ކުރިއަށް ގެންދިއުމަށް ހަމަޖައްސާފައިވަނީ އޮސްޓްރޭލިއާގެ ލީޑިންގ ޓްރެވެލް ކުންފުންޏެއްކަމަށްވާ 'ލަގްޒަރީ އެސްކޭޕްސް' އާއި ގުޅިގެންނެވެ. މި ދަތުރުތައް ކުރާނީ އޮސްޓްރޭލިއާގެ މެލްބާންއިންނެވެ. މި ދަތުރުތައް ފެށުމަކީ ޤައުމީ އެއަރލައިންއަށް ވެސް އަދި ދިވެހިރާއްޖެއަށް ވެސް ވަރަށް ތާރީހީ ކަމެއްކަމަށް މޯލްޑިވިއަނުން ވަނީ ފާހަގަކުރައްވާފައެވެ.
މި ދަތުރުތައް ފެށުމަކީ އޮސްޓްރޭލިއާއާއި ރާއްޖެއާއި ދެމެދު އޮތް ގުޅުން އިތުރަށް ބަދަހިވެގެންދާނެ ކަމެއްކަމަށް މޯލްޑިވިއަނުން ބުނެއެވެ. އޮސްޓްރޭލިއާއަކީ ރާއްޖޭގެ ފަތުރުވެރިކަމުގެ މާކެޓަށް މުހިއްމު ޤައުމެކެވެ. ސީދާ ދަތުރުތައް ފެށުމާއެކު އޮސްޓްރޭލިއާއިން ރާއްޖެއަށް އަންނަ ފަތުރުވެރިންގެ އަދަދު އިތުރުވާނެކަމަށް އުންމީދުކުރެވެއެވެ.
މޯލްޑިވިއަނުން ފަށާ މި ދަތުރުތަކަކީ ސީޒަނަލްކޮށް ހިންގާ ދަތުރުތަކެކެވެ. މި ދަތުރުތައް ފެށުމަށް ހަމަޖެހިފައިވަނީ އަންނަ މެއި މަހުގެ 17 ވަނަ ދުވަހުއެވެ. މޯލްޑިވިއަނުން ވިދާޅުވި ގޮތުގައި، މި ދަތުރުތައް ހަފްތާއަކު އެއް ފަހަރު ބޭއްވުމަށް ވަނީ ހަމަޖެހިފައެވެ. މި ދަތުރުތަކުގެ ސަބަބުން ދިވެހިރާއްޖޭގެ ފަތުރުވެރިކަމުގެ ދާއިރާއަށް ހެޔޮ ބަދަލުތަކެއް އަންނާނެކަމަށް ބެލެވެއެވެ.
