ރާއްޖޭގެ މާލީ ހިދުމަތްތައް ޑިޖިޓަލައިޒްކޮށް، ވިޔަފާރިތަކާއި އާއްމުންނަށް ޕޭމެންޓު ހިދުމަތްތައް ފަސޭހަ، ރައްކާތެރި އަދި ހަލުވި އިންތިޒާމުތަކެއްގެ ތެރެއިން ފޯރުކޮށްދިނުމުގެ މަގުސަދުގައި މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އުފެއްދި ކުންފުނި، ޕޭމެންޓް މޯލްޑިވްސް ޕްރައިވެޓް ލިމިޓެޑް، މިއަދު ރަސްމީކޮށް އިފުތިތާހުކޮށްފިއެވެ.
މިއަދު ބޭއްވުނު ޚާއްސަ ރަސްމިއްޔާތެއްގައި މި ކުންފުނި އިފުތިތާހުކޮށްދެއްވީ މަރުކަޒީ ބޭންކުގެ ގަވަނަރު އަހްމަދު މުނައްވަރެވެ. މި ކުންފުނީގެ މައިގަނޑު މަގުސަދަކީ ރީޓެއިލް ޕޭމެންޓު ނިޒާމުތައް ހަރުދަނާކޮށް ހިންގުމާއި، ޒަމާނީ ޓެކްނޮލޮޖީގެ އެކި ވަސީލަތްތަކުގެ ޒަރީއާއިން އައު ހިދުމަތްތައް ތައާރަފުކުރުމެވެ. މީގެކުރިން އެމްއެމްއޭއިން ފޯރުކޮށްދެމުން އައި ޕޭމެންޓު ހިދުމަތްތަކުގެ ތެރޭގައި ހިމެނޭ ފަވަރައާއި އޮޓޯމޭޓެޑް ހައުސް (އޭއެޗް) ފަދަ ރީޓެއިލް ޕޭމެންޓު ނިޒާމުތައް، އެމްއެމްއޭއާ ވަކިން، ވަކި މެނޭޖުމެންޓެއްގެ ބެލުމުގެ ދަށުން ހިންގައި ކުރިއެރުވުމުގެ ހުރިހާ ޒިންމާއެއް މިހާރު އަދާކުރާނީ ޕޭމެންޓް މޯލްޑިވްސް ޕްރައިވެޓް ލިމިޓެޑުންނެވެ.
މިހާރުގެ ހިދުމަތްތައް ކުރިއެރުވުމަށްޓަކައި، ކުރިއަށް ހުރި މުހިއްމު މަސައްކަތްތަކުގެ ތެރޭގައި ފަވަރައާއި އިންޑިއާގެ ޔޫނިފައިޑް ޕޭމެންޓްސް އިންޓަފޭސް (ޔޫޕީއައި) ގުޅުވައިލައި، ބޯޑަރު ހުރަސްކޮށް ޕޭމެންޓު ހެދޭނެ އިންތިޒާމު ހަމަޖެއްސުމުގެ މަސައްކަތް ހިމެނެއެވެ. މީގެ އިތުރުން، ޕޭއެމްވީ (PayMV) ކިއުއާރު ކޯޑު ތައާރަފުކުރުމުގެ މަސައްކަތް ވެސް މި ކުންފުނިން ކުރިއަށް ގެންދާނެއެވެ.
ރާއްޖެއަށް މިފަދަ ކުންފުންޏެއް އައު ނަމަވެސް، ޕޭމެންޓު ނިޒާމުތައް ގާއިމުކޮށް، އައު އީޖާދީ ވިސްނުންތަކާއެކު ތަރައްގީކުރުމުގެ މަސައްކަތަކީ އެކި ގައުމުތަކުގައި ކާމިޔާބުކަމާއެކު ތަޖުރިބާކޮށްފައިވާ ކަމެކެވެ. ޕޭމެންޓް މޯލްޑިވްސްގެ އަމާޒަކީ ދިވެހިރާއްޖޭގައި ޑިޖިޓަލް މާލީ ހިދުމަތްތަކުގެ ދާއިރާގައި އިންގިލާބީ ބަދަލުތަކެއް ގެނެސް، އިގްތިސާދީ ކުރިއެރުމަށް މަގުފަހިކުރުމެވެ.
