ދިވެހިރާއްޖޭގެ އިސްލާމީ ޔުނިވަރސިޓީ (އައި.ޔޫ.އެމް) އިން ދަރިވަރުންނަށް ހާއްސަކޮށްގެން ކުރިއަށްގެންދާ "ދަރިވަރުންގެ ސްކޯލާރޝިޕް ސްކީމް 2026" މިއަދު ރަސްމީކޮށް އިފްތިތާހްކޮށްފިއެވެ. މިއީ އެ ޔުނިވަރސިޓީގެ ކޯސްތަކަށް އަލަށް ވަންނަ ދަރިވަރުންނަށް އަމާޒުކޮށްގެން ޓިއުޝަން ފީ ހިލޭވާނެހެން ހުޅުވާލެވުނު ފުރުޞަތުތަކެކެވެ.
މި ސްކީމަކީ ދިވެހި ދަރިވަރުންގެ އިތުރުން ބައިނަލްއަޤްވާމީ ދަރިވަރުންނަށްވެސް ފުރުޞަތު ލިބޭގޮތަށް އައި.ޔޫ.އެމް އިން އަލަށް ތައާރަފުކުރި ސްކީމެކެވެ. މި ސްކީމްގެ ދަށުން ޖުމްލަ 25 ސްކޯލާރޝިޕް ފުރުޞަތު ވަނީ ހުޅުވާލާފައެވެ. އޭގެ ތެރޭގައި ހިމެނެނީ ދިވެހި ދަރިވަރުންނަށް ހާއްސަ 20 ފުރުޞަތާއި ބައިނަލްއަޤްވާމީ ދަރިވަރުންނަށް ހާއްސަ 5 ފުރުޞަތެވެ.
ދިވެހި ދަރިވަރުންނަށް ހުޅުވާލެވުނު 20 ފުރުޞަތުގެ ތެރޭގައި ހިމެނެނީ އެޑްވާންސް ސެޓްފިކެޓްގެ 10 ފުރުޞަތާއި، ބެޗްލާރސް ޑިޤްރީގެ 5 ފުރުޞަތު އަދި މާސްޓަރސް ލެވެލްގެ 5 ފުރުޞަތެވެ. މި ސްކޯލާރޝިޕްތަކުގެ ދަށުން ދަރިވަރުންގެ ޓިއުޝަން ފީ އާއި އެޑްމިނިސްޓްރޭޝަން ފީ މައާފު ކުރެވޭނެ ކަމަށް ޔުނިވަރސިޓީން މައުލޫމާތުދެއެވެ.
ބައިނަލްއަޤްވާމީ ދަރިވަރުންނަށް ކަނޑައެޅިފައިވާ 5 ފުރުޞަތުގެ ތެރޭގައި ހިމެނެނީ މާސްޓާރސް ޑިގްރީގެ 3 ފުރުޞަތާއި ބެޗްލާރސް ޑިގްރީގެ 2 ފުރުޞަތެވެ. މިއީ ރާއްޖޭގެ އިސްލާމީ ޔުނިވަރސިޓީން ބައިނަލްއަޤްވާމީ ފެންވަރުގައި ދަރިވަރުންނަށް ފުރުޞަތުތައް ފަހިކޮށްދިނުމަށް ކުރަމުންދާ މަސައްކަތުގެ ބައެކެވެ.
މި ސްކީމްގެ ދަށުން ސްކޯލާރޝިޕަށް އެދި ހުށަހެޅުމުގެ ސުންގަޑިއަކީ 31 ޖެނަވަރީ 2026 އެވެ. މި ސްކީމާ ގުޅޭ އިތުރު ތަފްސީލާއި ކުރިމަތިލާނެ ގޮތުގެ މައުލޫމާތު އިސްލާމީ ޔުނިވަރސިޓީގެ ރަސްމީ ފޭސްބުކް ޕޭޖުން ލިބެން ހުންނާނެ ކަމަށް އެ ޔުނިވަރސިޓީން ބުނެއެވެ.
