ޢަލީ އިޙްޞާން ފިރާޤް
މުއުމިނުން ނާކޮޅަށް އެރުން:
މާތްالله سبحانه وتعالى ގެ ފުރިހަމަ ބެއްލެވުމުގެ ދަށުން އެކަލާނގެ އަމުރުފުޅާ އެއްގޮތަށް نوح عليه السّلام ނާކޮޅު ބަންނަވައި ނިންމަވައިލެއްވިއެވެ. ކާފިރުވި ޤައުމުގެ މީސްތަކުންގެ މައްޗަށް މާތްﷲ ގެ ގަދަފަދަ ޢަޛާބު އައުމުގެ ވަގުތު ޖެހިއްޖެއެވެ. އެހިނދު މާތްﷲ، نوح عليه السّلام އަށް ކޮންމެ ޖަނަވާރެއްގެ ތެރެއިން އަންހެން އަދި ފިރިހެން ޖަނަވާރެއް ނާކޮޅަށް ލެއްވުމަށް އެންގެވިއެވެ. އީމާންވި މީސްތަކުންނާއި، نوح عليه السّلام ގެ އަހުލުވެރިންގެ ތެރެއިން އީމާންވި މީސްތަކުން ނާކޮޅަށް އެރުމަށް އެނގެވިއެވެ. މިކަމަށް އިޝާރާތްކުރައްވައި ކީރިތި ޤުރްއާނުގެ މުއުމިނޫން ސޫރަތުގެ 27 ވަނަ އާޔަތުގައި މާތްﷲ ވަޙީ ކުރައްވައިފައިވެއެވެ.
فَإِذَا جَاءَ أَمْرُنَا وَفَارَ التَّنُّورُ ۙ فَاسْلُكْ فِيهَا مِن كُلٍّ زَوْجَيْنِ اثْنَيْنِ وَأَهْلَكَ إِلَّا مَن سَبَقَ عَلَيْهِ الْقَوْلُ مِنْهُمْ ۖ وَلَا تُخَاطِبْنِي فِي الَّذِينَ ظَلَمُوا ۖ إِنَّهُم مُّغْرَقُونَ ﴿٢٧﴾
މާނައީ: [ފަހެ، ތިމަންރަސްކަލާނގެ (عذاب ގެ) أمر ފުޅުއައިސް އުނދުނުގެ ތެރެއިން ފެންއަރައި، އުތުރިގެންފިހިނދު، ފަހެ، އެހިނދު ކޮންމެ އެއްޗަކުން (އަންހެން ފިރިހެން) ޖޯޑަކާއި، އެއުރެންގެ ތެރެއިން ހަލާކުވުމުގެ أمر ފުޅު އިސްވެހިނގައްޖެމީހަކު މެނުވީ، ކަލޭގެފާނުގެ أهل ވެރިން އެ ނާކޮޅަށް ލައްވާށެވެ! އަދި އަނިޔާވެރިވީ މީހުންނާމެދު، ތިމަންރަސްކަލާނގެ حضرة އަށް ކަލޭގެފާނު ބަސް ނުދަންނަވާށެވެ! ހަމަކަށަވަރުން، އެއުރެންނީ، غرق ކުރައްވާނޭ މީހުންނެވެ.]
