ޢަލީ އިޙްޞާން ފިރާޤް
ދަރިދަރިކަލުން:
ޠޫފާނަށްފަހު، ދުނިޔެއަށް އައި މީހުން އައިސްފައިވަނީ، نوح عليه السّلام ގެ ދަރިދަރިކަލުންގެ ނަސްލުންނެވެ. ޢަބްދުﷲ ބިން ޢައްބާސް ރަޟިޔަﷲ ޢަންހުގެ އަރިހުން ރިވާވެގެންވެއެވެ. "ޠޫފާނަށްފަހު އުފަންވި ހުރިހާ އެންމެން އައިސްފައިވަނީ، ނޫޙޫގެފާނުގެ ނަސަބުފުޅުންނެވެ. އެހެން އެންމެން ދަރިފަސްކޮޅެއްނެތި މަރުވެގެން ދިޔައީއެވެ."{ތަފްސީރު އިބްނު ކަޘީރު އިނގިރޭސި ތަރުޖަމާ، އަށްވަނަ ޖިލްދު، ޞަފްޙާ 260}
މިދެންނެވުނު ރިވާޔަތަށް ކީރިތި ޤުރްއާނުގެ އައްޞާފާތު ސޫރަތުގެ 77 ވަނަ އާޔަތުން ދަލީލު ލިބެއެވެ. އެ އާޔަތުގައި މާތްﷲ ވަޙީ ކުރައްވައިފައިވެއެވެ.
وَجَعَلْنَا ذُرِّيَّتَهُ هُمُ الْبَاقِينَ ﴿٧٧﴾
މާނައީ: [އަދި ދެންތިބި ބަޔަކީ، އެކަލޭގެފާނުގެ ދަރިކޮޅުކަމުގައި ތިމަންރަސްކަލާނގެ ލެއްވީމެވެ.]
އިމާމު ތިރްމިޛީއާއި، އިބްނު އަބީޙާތިމާއި، އިބްނު ޖަރީރު، ސަމުރަތު ބުނު ޖުންދުބު ރަޟިޔަﷲ ޢަންހުގެ އަރިހުން ރިވާ ކުރައްވައިފައިވެއެވެ. (وَجَعَلْنَا ذُرِّيَّتَهُ هُمُ الْبَاقِينَ ﴿٧٧﴾މާނައީ: [އަދި ދެންތިބި ބަޔަކީ، އެކަލޭގެފާނުގެ ދަރިކޮޅުކަމުގައި ތިމަންރަސްކަލާނގެ ލެއްވީމެވެ.]) މި އާޔަތުގެ ތަފްސީރާ ބެހޭގޮތުން މާތް ނަބިއްޔާ ﷺ ޙަދީޘް ކުރައްވައިފައިވެއެވެ. [އެއީ، ސާމު އާއި، ޔާފިޘު އާއި، ޙާމުއެވެ.] { الألباني (ت ١٤٢٠)، ضعيف الترمذي ٣٢٣٠ • إسناده ضعيف}
އަދިވެސް ތިރުމިޛީގައިވާ އެހެން ރިވާޔަތެއްގައިވެއެވެ. ސަމުރަތު ބުނު ޖުންދުބު ރަޟިޔަﷲ ޢަންހު ވިދާޅުވެފައިވެއެވެ. މާތް ނަބިއްޔާ محمّد صلّى اللّـه عليه وسلّم ޙަދީޘް ކުރެއްވިއެވެ.
سامٌ أبو العَربِ، ويافثُ أبو الرُّومِ، وحامٌ أبو الحبَشِ }الألباني (ت ١٤٢٠)، ضعيف الترمذي ٣٩٣١ • ضعيف}
މާނައީ: ]ސާމަކީ ޢަރަބީންގެ ބައްޕައެވެ. (އެބަހީ: ޢަރަބީން އައިސްފައިވަނީ ސާމުގެ ދަރިފަސްކޮޅުންނެވެ.) ރޫމީންގެ ބައްޕައަކީ ޔާފިޘެވެ. (އެބަހީ: ރޫމީން އައިސްފައިވަނީ ޔާފިޘުގެ ދަރިފަސްކޮޅުންނެވެ.) ޙަބަޝީންގެ ބައްޕައަކީ ޙާމެވެ. (އެބަހީ: ޙަބަޝީން އައިސްފައިވަނީ، ޙާމުގެ ދަރިފަސްކޮޅުންނެވެ.)]
މިދެންނެވި ދެ ޙަދީޘަކީ ޟަޢީފު ދެ ޙަދީޘެވެ. ނަމަވެސް ތޫފާނަށްފަހު ދެން އައި މީސްތަކުން އައިސްފައިވަނީ ނޫޙުގެފާނުގެ ނަސަބުފުޅުންކަމުގައި ކީރިތި ޤުރްއާނުގެ އައްޞާއްފާތު ސޫރަތުގެ 77 ވަނަ އާޔަތުން ދޭހަވެއެވެ.
އަރަހުށި މާތް ﷲ، نوح عليه السّلام އަށް ޞަލަވާތާއި ސަލާމްލައްވާށިއެވެ.!އާމީން!
