ހއ. ދިއްދޫގެ ބިން ހިއްކުމަށް ކުރިއަށްގެންދާ ބިޔަ މަޝްރޫޢުގެ ދަށުން މިހާތަނަށް 63 ހެކްޓަރުގެ ބިން ހިއްކައި ނިމިފައިވާ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހާމަކޮށްފިއެވެ.
ދިއްދޫގައި އެއަރޕޯޓް ތަރައްޤީކުރުމާއި ބޯހިޔާވަހިކަމުގެ މައްސަލައަށް ޙައްލެއް ހޯދުމުގެ މަޤްޞަދުގައި ކުރިއަށްގެންދާ މި މަޝްރޫޢުގެ މަސައްކަތް އެމްއޭސީއެލްއާ ޙަވާލުކޮށްގެން ފަށާފައިވަނީ މިއަހަރުގެ ޖަނަވަރީ މަހުގެ 5 ވަނަ ދުވަހުއެވެ. މި މަޝްރޫޢުގެ ދަށުން ޖުމުލަ 112 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ.
މި މަޝްރޫޢުގެ ކުރިއެރުމާ ގުޅޭގޮތުން ޕީއެސްއެމް ނިއުސްއަށް މަޢުލޫމާތު ދެއްވަމުން އެމްއޭސީއެލްއިން ވިދާޅުވީ، މިހާތަނަށް 63 ހެކްޓަރުގެ ބިން ހިއްކައި ނިމިފައިވާ ކަމަށެވެ. މިއީ މުޅި މަޝްރޫޢުގެ 56.25 އިންސައްތަ މަސައްކަތެވެ.
ދިއްދޫ ބިން ހިއްކުމުގެ މި މަޝްރޫޢަކީ އެ ރަށުގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ ދަތިކަމަށް ދާއިމީ ޙައްލެއް ހޯދައިދިނުމަށާއި، ރަށުގެ އިޤްތިޞާދީ ދުވެލި ހަލުވިކުރުމަށްޓަކައި ސަރުކާރުން އިސްކަންދީގެން ކުރިއަށްގެންދާ މުހިންމު މަޝްރޫޢެކެވެ. ޚާއްޞަކޮށް މި ބިމުގެ ބޮޑު ބައެއް އެއަރޕޯޓް ތަރައްޤީކުރުމަށް ޚާއްޞަކުރެވިފައިވުމަކީ އެ ސަރަޙައްދުގެ ދަތުރުފަތުރުގެ ނިޒާމަށް ލިބިގެންދާނެ ބޮޑު ކުރިއެރުމެކެވެ.
މި މަޝްރޫޢުގެ މަސައްކަތްތައް އެމްއޭސީއެލްއިން ބާރުސްޕީޑުގައި ކުރިއަށްގެންދާއިރު، ބާކީ ހުރި ބައި ހިއްކުމުގެ މަސައްކަތްވެސް ތާވަލާ އެއްގޮތަށް ކުރިއަށްދާނެ ކަމަށް އެ ކުންފުނިން ވަނީ ބުނެފައެވެ.
