ޤައުމުގެ މިޞްރާބު 20 އަހަރު ދުވަހުގެ މުއްދަތަށް ކަނޑައަޅައި، އެ މިޞްރާބަށް ޤާނޫނީ ބާރުވެރިކަން ދިނުމަކީ ޤައުމުގެ ތަރައްޤީއަށްޓަކައި ކުރެވޭނެ އެންމެ ބިނާކުރަނިވި މަސައްކަތް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ މިއަހަރުގެ ރިޔާސީ ބަޔާން އިއްވަވަމުންނެވެ.
ރައީސްގެ ބަޔާނުގައި ފާހަގަކުރެއްވި ގޮތުގައި، ރައްޔިތުންނަށް އެންމެ ބޮޑު ނިކަމެތިކަމެއް ކުރިމަތިވާ އެއް ކަމަކީ ކޮންމެ ފަސް އަހަރަކުން ޤައުމުގެ މިޞްރާބު ބަދަލުވެގެންދާ ދިޔުމެވެ. އެހެންކަމުން، ރައްޔިތުންގެ އަޑުއަހައިގެން 20 އަހަރުގެ ދުރު ރާސްތާ އަމާޒެއް ކަނޑައެޅުމަކީ ޤައުމުގެ ހަމަޖެހުމާއި ރައްކާތެރިކަމަށް ކޮށްދެވޭނެ އެންމެ މާނަހުރި ޚިދުމަތް ކަމަށް އެމަނިކުފާނު ވިދާޅުވިއެވެ.
ޤައުމީ ތަރައްޤީގެ 20 އަހަރު ދުވަހުގެ ޕްލޭންގެ މައިގަނޑު މިހާރު އެކުލަވާލެވިފައިވާކަން ހާމަކުރައްވަމުން ރައީސް ވިދާޅުވީ، "މި ހުރިހާ ބައްދަލުވުންތަކުގައި ލިބުނު ޚިޔާލާއެކު، ޤައުމީ ތަރައްޤީގެ 20 އަހަރު ދުވަހުގެ ޕްލޭންގެ މައިގަނޑު މިހާރު ވަނީ އެކުލަވާލެވިފައި،" ކަމަށެވެ. މި މަސައްކަތުގެ ދެން އޮތް މަރުޙަލާއަކީ ސަރަޙައްދީ ފެންވަރުގައި ބާއްވާ ވެލިޑޭޝަން ބައްދަލުވުންތައް ކަމަށްވެސް އެމަނިކުފާނު ވިދާޅުވިއެވެ.
މި ބައްދަލުވުންތައް މިއަހަރުގެ މޭ މަހުގެ ނިޔަލަށް ބޭއްވުމަށް ވަނީ ތާވަލުކުރެވިފައެވެ. މި ބައްދަލުވުންތަކުގެ މައިގަނޑު މަޤްޞަދަކީ މި ޕްލޭނަކީ ހުރިހާ ރައްޔިތުންގެ ބައިވެރިވުން ހިމެނޭ ގޮތަށް ތައްޔާރުކުރެވިފައިވާ ލިޔުމެއްކަން ކަށަވަރުކުރުމާއި، އެކަން ތަންފީޒުކުރުމުގައި ރައްޔިތުންގެ ފުރިހަމަ އެއްބާރުލުން ހޯދުމެވެ.
ރައީސުލްޖުމްހޫރިއްޔާ އިތުރަށް ވިދާޅުވީ، 20 އަހަރުގެ ޤައުމީ ތަރައްޤީގެ ޕްލޭންގެ ތަންފީޒީ އަދި މޮނިޓަރިންގ އޮނިގަނޑާއެކު އެކުލަވައިލެވޭ އެންމެފަހުގެ ޕްލޭން، މިއަހަރުގެ ޖުލައި މަސް ނިމުމުގެ ކުރިން އެއްކޮށް ނިންމަވާނެ ކަމަށެވެ. މިއީ ދިވެހިރާއްޖޭގެ މުސްތަޤްބަލް ބައްޓަންކުރުމަށް އެޅޭ މުހިންމު ފިޔަވަޅެއްގެ ގޮތުގައި ސަރުކާރުން ދެކެއެވެ.
