ވެލާނާ އިންޓަރނޭޝަނަލް އެއަރޕޯޓް (ވީއައިއޭ)ގެ ޑޮމެސްޓިކް ޓާމިނަލްގެ އޮޕަރޭޝަންސްތައް، ޓާމިނަލް 2 (ކުރީގެ އިންޓަރނޭޝަނަލް ޓާމިނަލް) އަށް ރަސްމީކޮށް ބަދަލުކޮށްފިއެވެ. މި ބަދަލާއެކު އެތެރޭގެ އުދުހުންތަކަށް ބޭނުންކުރާ ޚިދުމަތްތަކަށް ބޮޑު ކުރިއެރުމެއް ލިބިގެންދާނެއެވެ.
ޑޮމެސްޓިކް ޓާމިނަލްގެ އޮޕަރޭޝަންތައް ޓާމިނަލް 2 އަށް ބަދަލުކުރުމުގެ ގޮތުން މިއަދު ބޭއްވި ޚާއްޞަ ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ ނައިބު އަލްއުސްތާޛު ހުސައިން މުހައްމަދު ލަޠީފް އެވެ. މި ރަސްމިއްޔާތުގައި ދައުލަތުގެ ވަޒީރުންގެ އިތުރުން މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ބޯޑް މެންބަރުންނާއި އިސްވެރިން ބައިވެރިވެވަޑައިގެންނެވިއެވެ.
މި ބަދަލު ގެނައުމަށްޓަކައި ޓާމިނަލަށް ބޮޑެތި ބަދަލުތަކެއް ގެނެސްފައިވާއިރު، މި މަސައްކަތްތައް ކުރިއަށް ގެންގޮސްފައިވަނީ އެމްއޭސީއެލްގެ އެކި ޑިޕާޓްމަންޓްތަކުގެ މުވައްޒަފުންގެ ބައިވެރިވުމާއެކުގައެވެ. މިއީ އެއަރޕޯޓުގެ ޚިދުމަތްތައް ހަރުދަނާކުރުމަށް ކުރެވެމުންދާ މަސައްކަތުގެ މުހިންމު ފިޔަވަޅެކެވެ.
އާ ޓާމިނަލާއެކު ޚިދުމަތްތަކުގެ ފެންވަރު ވަނީ ބޮޑުތަނުން މަތިކުރެވިފައެވެ. އެގޮތުން ކުރީގެ ޑޮމެސްޓިކް ޓާމިނަލްގައި ހުރި 8 ޗެކް-އިން ކައުންޓަރުގެ ބަދަލުގައި، ޓާމިނަލް 2 ގައި 27 ޗެކް-އިން ކައުންޓަރު ހުންނާނެއެވެ. މީގެ އިތުރުން ސެކިއުރިޓީ ކްލިއަރެންސަށް 3 މެޝިން ބެހެއްޓިފައިވާއިރު، ފުރާ މީހުންނަށް ޚާއްޞަ 6 ޑިޕާޗާ ގޭޓު މިހާރު ހުންނާނެއެވެ.
މި ރަސްމިއްޔާތުގައި ޓާމިނަލްގެ އޮޕަރޭޝަންސްތައް ބަދަލުކުރުމުގެ އަމަލީ މަސައްކަތުގައި ހަރަކާތްތެރިވި މުވައްޒަފުންވެސް ބައިވެރިވެފައިވެއެވެ. މި ބަދަލާއެކު ފަސިންޖަރުންނަށް ލިބޭ ޖާގަ ތަނަވަސްވެ، ޚިދުމަތް ހޯދުމުގައި ހޭދަވާ ވަގުތު ކުޑަވެގެންދާނެ ކަމަށް ބެލެވެއެވެ.
