މާލޭ ނޯތު ހާބަރުގެ އޭ ޒޯނަށް ކަރަންޓާއި ފެނުގެ ޚިދުމަތް ފޯރުކޮށްދިނުމަށް ބޭނުންވާ މަސައްކަތްތައް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ފަށައިފިއެވެ. މިއީ އެ ސަރަހައްދު ބޭނުންކުރާ އުޅަނދުފަހަރަށް ލުއިފަސޭހަކޮށްދިނުމުގެ ގޮތުން ކުރިއަށްގެންދާ މަސައްކަތެކެވެ.
އެމްޕީއެލް އިން ހާމަކޮށްފައިވާ ގޮތުގައި، ބޮޑުތަކުރުފާނު މަގު ތަރައްޤީކުރުމުގެ މަސައްކަތަށްޓަކައި މީގެ ކުރިން އެމް.އެމް.އޭ ސަރަހައްދާއި ހުޅުމާލެ ޕެޓްރޯލް ޖެޓީއަށް ވަގުތީ ގޮތުން ބަދަލުކުރި މުދަލާއި ޕަސެންޖަރުން އުފުލާ އުޅަނދުތައް މިހާރު ވަނީ އަލުން ނޯތު ހާބަރުގެ 'އޭ ޒޯން' އަށް ބަދަލުކޮށްފައެވެ. މި ސަރަހައްދަކީ ބޮޑުތަކުރުފާނު މަގާވީ ފަރާތު ތޮށިގަނޑެވެ.
ނޯތު ހާބަރުގެ ޓީމުން މިހާރު އެންމެ އިސްކަމެއް ދީގެން ކުރަމުންދާ މަސައްކަތަކީ، މީގެ ކުރިން 'އޭ ޒޯން' އިން ލިބެން ނެތް ކަރަންޓާއި ފެނުގެ ޚިދުމަތް އެ ސަރަހައްދުން ފޯރުކޮށްދިނުމެވެ. މި ޚިދުމަތްތައް ގާއިމުކުރެވުމުން ބަނދަރުގައި މަޑުކުރާ އުޅަނދުފަހަރަށް ބޭނުންވާ އަސާސީ ޚިދުމަތްތައް ފަސޭހަކަމާއެކު ލިބިގެންދާނެއެވެ.
މި ސަރަހައްދުގެ ޚިދުމަތް އަލުން ފެށިއިރު ގެނެވުނު އެންމެ ބޮޑު އެއް ބަދަލަކީ ބަނދަރުގެ އިންފްރާސްޓްރަކްޗަރަށް ގެނެވުނު އިސްލާހުތަކެވެ. އެގޮތުން ބޭނުންނުކުރެވޭ ވަރަށް ހަލާކުވެފައި ހުރި ފައްތިޔާތަކުގެ ބަދަލުގައި 36 ފައްތިއްޔާ ބުޑު ފައްތައި، މުޅިން އައު ފައްތިއްޔާތައް މިހާރު ވަނީ ބޭނުންކުރަން ފަށާފައެވެ. މި ބަދަލާއެކު އުޅަނދުފަހަރު ބަނދަރުކުރުމުގައި ކުރިއަށްވުރެ ރައްކާތެރިކަން އިތުރުވެގެންދާނެ ކަމަށް އެމްޕީއެލް އިން ބުނެއެވެ.
މީގެ އިތުރުން، ކުރިއަށް އޮތް ހަފުތާގެ ތެރޭގައި ނޯތު ހާބަރުގެ 'ބީ ޒޯން' ނުވަތަ ހުޅަނގު ފަރާތު ތޮށިގަނޑަށް އުޅަނދުތައް ބަދަލުކުރުމުގެ މަސައްކަތްވެސް އެމްޕީއެލް އިން ދަނީ ކުރަމުންނެވެ. މިއީ މާލޭގެ އުތުރު ފަރާތު ބަނދަރުގެ ތަރުތީބު ހަރުދަނާކޮށް، ވިޔަފާރިވެރިންނާއި އާންމުންނަށް ދޭ ޚިދުމަތްތައް ރަނގަޅުކުރުމަށް ކުރެވޭ މަސައްކަތުގެ ބައެކެވެ.
