މެދު އިރުމަތީގައި މިހާރު ހިނގަމުންދާ ހަމަނުޖެހުންތަކާ ގުޅިގެން، ރާއްޖެއަށް ދަތުރުކުރާ އެއާލައިންތަކަށް ދިމާވެދާނެ ގޮންޖެހުންތަކަށް ހައްލެއް ހޯދުމުގެ ގޮތުން އިތުރު އެއާލައިންތައް ރާއްޖެ ގެނައުމާ ގުޅޭގޮތުން މަޝްވަރާ ކުރަމުންދާކަމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ހާމަކޮށްފިއެވެ.
ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ނެރުނު ނޫސްބަޔާނެއްގައި ވިދާޅުވީ، މެދުއިރުމަތީގެ މަޝްރަހަށް އަންނަމުންދާ ބަދަލުތަކާއި، އެ ސަރަހައްދުގެ ވައިގެ ސަރަހައްދު ބޭނުންކުރުމުގައި އަޅާފައިވާ ފިޔަވަޅުތަކުގެ ސަބަބުން ކުރިމަތިވެފައިވާ ހާލަތު އެ ވުޒާރާއިން ވަރަށް ގާތުން ބަލަމުން އަންނަ ކަމަށެވެ. މިއީ ރާއްޖޭގެ ވައިގެ ދަތުރުފަތުރަށް ބުރޫއަރާފާނެ ކަމެއް ކަމަށްވާތީ، އެކަމަށް ދުރާލާ ތައްޔާރުވަމުންދާ ކަމަށްވެސް އެ ވުޒާރާއިން ވިދާޅުވިއެވެ.
އެ ވުޒާރާގެ ބަޔާނުގައި ފާހަގަކޮށްފައިވާ ގޮތުގައި، މެދުއިރުމަތިން ރާއްޖެއަށް ކުރާ ދަތުރުތަކަކީ ރާއްޖޭގެ އިޤްތިޞާދާ ވަރަށް ބޮޑަށް ގުޅިފައިވާ މުހިންމު ދަތުރުތަކެކެވެ. އެހެންކަމުން، ރާއްޖެއަށް މިހާރު ދަތުރުކުރާ މައިގަނޑު އެއާލައިންތަކާއި، ކަމާގުޅޭ ބައިނަލްއަޤްވާމީ އިދާރާތަކާ ގުޅިގެން މެދުނުކެނޑި މަސައްކަތް ކުރަމުންދާ ކަމަށް ވުޒާރާއިން މައުލޫމާތު ދެއެވެ.
ސަރުކާރުގެ އެންމެ އިސް އަމާޒަކީ މި ހާލަތުގެ ސަބަބުން ރާއްޖެއަށް ޒިޔާރަތްކުރާ ފަތުރުވެރިންނަށާއި، ރާއްޖެއިން ބޭރަށް ދަތުރުކުރާ ދިވެހިންގެ އިތުރުން ރާއްޖޭގައި ދިރިއުޅޭ އެންމެހާ ފަރާތްތަކަށް ކުރިމަތިވެދާނެ ދަތިތައް ވީހާވެސް ކުޑަކުރުން ކަމަށް ދަތުރުފަތުރާ ބެހޭ ވުޒާރާއިން ވިދާޅުވިއެވެ. މިގޮތުން ވައިގެ ދަތުރުފަތުރުގެ ވިއުގަ ވަރުގަދަކޮށް، މެދުނުކެނޑި ދަތުރުތައް ކުރިއަށް ގެންދެވޭނެ އިންތިޒާމުތައް ހަމަޖެއްސުމަށް ދަނީ މަސައްކަތް ކުރަމުންނެވެ.
