މި ހިނގާ މަހުގެ ތެރޭގައި ރާއްޖޭގެ 31 ރަށަކަށް އެމްބިއުލާންސް ފޮނުވުމަށް ސަރުކާރުން ނިންމައިފިއެވެ. މިކަން ހާމަކުރެއްވީ ހެލްތް މިނިސްޓަރު ޢަބްދުﷲ ނާޒިމް އިބްރާޙިމް މިއަދު ބޭއްވި ނޫސްވެރިންގެ ބައްދަލުވުމެއްގައެވެ.
މިނިސްޓަރު ވިދާޅުވި ގޮތުގައި، އެމްބިއުލާންސް ފޮނުވުމުގައި އެންމެ ބޮޑު އިސްކަމެއް ދެނީ އެމްބިއުލާންސްގެ ހިދުމަތް މެދުކެނޑިފައިވާ ރަށްރަށަށާއި، މިހާރު ހުރި އެމްބިއުލާންސްތައް ހަލާކުވެ ބޭނުންނުކުރެވޭ ހާލަތުގައި ހުރި ރަށްރަށަށެވެ. މިއީ ރަށްރަށުގައި ކުއްލި ފަރުވާ ބޭނުންވާ ބަލިމީހުން ސިއްހީ މަރުކަޒުތަކަށް ގެންދިއުމުގައި ދިމާވާ ދަތިތަކަށް ހައްލެއް ހޯދުމަށް ކުރިއަށްގެންދާ މަސައްކަތެކެވެ.
މި މަހު ފޮނުވުމަށް ހަމަޖެހިފައިވާ އެމްބިއުލާންސްތައް ފޮނުވުމަށް ނިންމާފައިވަނީ ދެ ބުރަކަށް ބަހާލައިގެންނެވެ. އެގޮތުން އަންނަ ހަފްތާގެ ތެރޭގައި 14 ރަށަކަށް އެމްބިއުލާންސް ފޮނުވުމަށް ވަނީ ތާވަލުކުރެވިފައެވެ. އަދި މި މަހުގެ ފަހުކޮޅު އިތުރު 17 ރަށަކަށް އެމްބިއުލާންސް ފޮނުވުމަށް ހަމަޖެހިފައިވާ ކަމަށް މިނިސްޓަރު ވިދާޅުވިއެވެ.
މިނިސްޓަރު ނާޒިމް އިތުރަށް ފާހަގަކުރެއްވި ގޮތުގައި، މިދިޔަ މަހުގެ ތެރޭގައި ވެސް ސަރުކާރުން ވަނީ 56 ރަށަކަށް އެމްބިއުލާންސް ފޮނުވާފައެވެ. މިއީ ރާއްޖޭގެ ސިއްހީ ނިޒާމު ހަރުދަނާކޮށް، ރަށްރަށުގައި ދެވޭ ހިދުމަތްތަކުގެ ފެންވަރު މަތިކުރުމަށް ސަރުކާރުން ކުރަމުންދާ މަސައްކަތުގެ ތެރެއިން ކުރިއަށްދާ މުހިންމު މަޝްރޫއެކެވެ.
