ގއ. ކޮނޑޭއާއި ކ. ކާށިދޫގައި ސަރުކާރުން ކުރިއަށްގެންދާ ދަނޑުވެރިކަމުގެ މަޝްރޫޢާއެކު، ދަނޑުވެރިކަމުގެ އުފެއްދުންތަކަށް އަގު އެއްކޮށްގެން (ވެލިއު އެޑް ކޮށްގެން) ތަކެތި ވިއްކުމަށް ބޮޑު ކުރިއެރުމެއް ލިބިގެންދާނެ ކަމަށް ދަނޑުވެރިކަމާއި ދިރޭ ތަކެއްޗާއި ބެހޭ ވަޒީރު ޑރ. މަރިޔަމް މާރިޔާ ވިދާޅުވެއްޖެއެވެ. ވަޒީރު މިހެން ވިދާޅުވީ އެ ވުޒާރާއިން ކުރަމުންދާ މަސައްކަތްތަކާ ގުޅޭގޮތުން ޕީއެސްއެމް ނިއުސްއަށް ދެއްވި ޚާއްޞަ އިންޓަވިއުއެއްގައެވެ.
ވަޒީރު ވިދާޅުވީ، ކޮނޑޭއާއި ކާށިދޫގައި ޕަބްލިކް-ޕްރައިވެޓް ޕާޓްނަރޝިޕް (ޕީޕީޕީ) މޮޑެލްގެ ދަށުން ވިޔަފާރި އުސޫލުން ދަނޑުވެރިކަން ކުރުމަށް ހުޅުވާލާފައިވާ ފުރުސަތުތަކަކީ ވަރަށް އުއްމީދީ މަސައްކަތްތަކެއް ކަމަށެވެ. މިހާރުވެސް އެ ދެ ރަށަކީ ފުޅާދާއިރާއެއްގައި ދަނޑުވެރިކަން ކުރަމުންދާ ރަށްތަކެއްކަން ވަޒީރު ފާހަގަކުރެއްވިއެވެ.
ސަރުކާރުގެ އަމާޒަކީ ރާއްޖޭގައި އުފެއްދޭ ކާބޯތަކެތީގެ މައިގަނޑު ބާވަތްތައް އާބާދީއަށް އެކަށީގެންވާ މިންވަރަށް އުފައްދައި، ރާއްޖޭގެ ކާނާގެ ރައްކާތެރިކަން ނުވަތަ ފުޑް ސެކިއުރިޓީ ކަށަވަރުކުރުމެވެ. މި އަމާޒަށް ވާސިލްވުމަށްޓަކައި އެގްރިކަލްޗަރ އިންވެސްޓްމަންޓްތަކަށް މިހާރު ފަހި މާޙައުލެއް ޤާއިމްކުރެވިފައިވާ ކަމަށް ސަރުކާރުން ހާމަކުރެއެވެ.
ޑރ. މަރިޔަމް މާރިޔާ އިތުރަށް ވިދާޅުވީ، ދަނޑުވެރިކަމަށް ޚާއްޞަ ކުރެވިފައިވާ ބިންތަކަށް އިންވެސްޓަރުން ހޯދައިގެން މި މަސައްކަތް ފުޅާކުރުމަކީ ދަނޑުވެރިންނަށާއި އިންވެސްޓަރުންނަށް ލިބޭނެ ބޮޑު ކުރިއެރުމެއް ކަމަށެވެ. މީގެ ސަބަބުން އުފެއްދުންތެރިކަން އިތުރުވެ، އިޤްތިޞާދީ ގޮތުން ނަފާލިބޭނެ މަގުތައް ތަނަވަސްވެގެންދާނެއެވެ.
މި މަޝްރޫޢުތަކުގެ މައިގަނޑު ބޭނުމަކީ ވިލުންތެރި އިޤްތިޞާދެއް ބިނާކުރުމާއި، ރާއްޖޭގެ ދަނޑުވެރިކަމުގެ ސިނާޢަތް އައު ހިސާބަކަށް ގެންގޮސް، ބޭރުން އެތެރެކުރާ ތަކެތީގެ މައްޗަށް ބަރާސާވާ މިންވަރު ކުޑަކުރުމެވެ.
