ހުއްޓިފައި އޮތް ރ. އަލިފުށީ އެއާޕޯޓް ތަރައްޤީކުރުމުގެ މަސައްކަތް އަލުން ފެށުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ތައްޔާރުވެއްޖެއެވެ. އަތޮޅުގެ އެހެން ރަށްތަކާއި އެކަހެރި ގޮތަކަށް އޮންނަ އަލިފުށީގައި އެއާޕޯޓެއް ތަރައްޤީކުރުމަކީ އެރަށު ރައްޔިތުންގެ ޒަމާންވީ އުއްމީދަކާ ގުޅިފައިވާ ކަމެކެވެ.
އަލިފުށީ އެއާޕޯޓުގެ ޢަމަލީ މަސައްކަތް ފެށީ 2022 ވަނަ އަހަރުގައެވެ. މި މަޝްރޫޢުގެ ދަށުން މިހާތަނަށް އައިރު އެއާޕޯޓް ޓާމިނަލްގެ ބޮޑު ބައެއް ވަނީ ނިންމާފައެވެ. މީގެއިތުރުން، އެއާޕޯޓުގެ ފަޔަރ ބިލްޑިންގްގެ މަސައްކަތްވެސް މިހާރު ހުރީ ގާތްގަނޑަކަށް އެއްކޮށް ނިމުމުގެ މަރުހަލާގައެވެ.
މި އެއާޕޯޓުގެ މަސައްކަތް ނުނިމި ދިގުލައިގެން ގޮސްފައިވާއިރު، މަސައްކަތް އަލުން ފެށުމަށް އެމްޓީސީސީން މިހާރު އަންނަނީ ބާރަށް ތައްޔާރުވަމުންނެވެ. އެ ކުންފުނިން ހާމަކުރި ގޮތުގައި، އެއާޕޯޓުގެ ސްޓްރަކްޗަރއަށް ބޭނުންވާ ފިނިޝިންގ ސާމާނު މިހާރުވެސް ސައިޓަށް ގެންގޮސްފައިވެއެވެ. "މިހާރު މަސައްކަތް ކުރަމުން ދަނީ ރޯދައިގެ ފަހުން އެއާޕޯޓުގެ މަސައްކަތްތައް އަލުން ފެށުމަށް" ކަމަށް އެމްޓީސީސީން ވިދާޅުވިއެވެ.
އަލިފުށީގައި އެއާޕޯޓެއް ތަރައްޤީކުރުމަށްޓަކައި ޖުމްލަ 505 ހެކްޓަރުގެ ބިން ވަނީ ހިއްކާފައެވެ. މީގެތެރެއިން 80 އިންސައްތަ ބިން ބޭނުންކުރުމަށް ހަމަޖެހިފައިވަނީ އެއާޕޯޓު ތަރައްޤީކުރުމަށެވެ. ބާކީ އޮތް 10 އިންސައްތަ ބިން ބޭނުންކުރުމަށް ހަމަޖެހިފައިވަނީ އަލިފުށްޓަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ޙައްލެއް ހޯދުމަށާއި، ރަށުގެ އިޤްތިޞާދީ މަސައްކަތްތަކަށް ދޫކުރުމަށެވެ.
ގާތްގަނޑަކަށް 3000 މީހުންގެ އާބާދީއެއް އޮންނަ އަލިފުށީގައި މި އެއާޕޯޓް ނިމުމުން، ދަތުރުފަތުރުގެ ދަތިކަމަށް ބޮޑު ލުޔެއް ލިބި، ރަށުގެ އިޤްތިޞާދަށް އާ ދިރުމެއް ލިބިގެންދާނެ ކަމަށް ބެލެވެއެވެ.
