ކޮންމެ މީހަކީވެސް ރިޒުޤަށް ބޭނުންވާނެ މީހެކެވެ. ލިބޭ ރިޒުޤް އިތުރުވުމަށް އެދޭނެވެސް މީހެކެވެ. ވީމާ މިކަންކަމަށް ވިސްނައިލުން ބުއްދިވެރިއެވެ. ވިސްނާ މީހަކަށް ފައިދާކުރާނެއެވެ. އިން ޝާ ﷲ
ފަހެ ރިޒްޤު ހޯދުމުގައި އެމީހެއްގެ ގުނަވަންތައް ބޭނުންކޮށްގެން މަސައްކަތްކުރުމާއެކު ދީލަތިވަންތަ ޚާލިޤުވަންތަ ﷲ އަށް އެމީހެއްގެ ހިތުން ވަކީލުކުރާށެވެ.
އަދި ދުނިޔަވީ ޙަޔާތުގެ އުންމީދުތަކަށް މާ ބޮޑަށް ޝައުޤުވެރި ނުވާށެވެ. އެކަމުގެ ސަބަބުން ވަކީލުކުރުމުގެ ދާއިރާއިން ތިބާ ބޭރުވެ، އެކަންކަން ޙާޞިލުކުރުމުގައި ހަމައެކަނި ސަބަބުގައި ހިފާ މީހަކަށްވެ، ވަކީލުކުރުން ދޫކޮށްލާ މީހަކަށް ވެދާނެއެވެ.
ﷲ ތަޢާލާ ތިބާއަށް ދޮރެއް ބަންދުކުރައްވައިފިނަމަ އެއިލާހުގެ ރަޙްމަތުން އެއަށްވުރެ ފައިދާ ބޮޑު ދޮރެއް ހުޅުއްވާ ދެއްވާނެއެވެ.
ފަހެ އެންމެ ބާރުގަދަ މީހުންގެ ތެރެއިންވުމަށް އެދޭ މީހާ ﷲ އަށް ވަކީލުކުރާށެވެ.
އަދި އެންމެ ފުދުންތެރިމީހުންގެ ތެރެއިން ވުމަށް އެދޭމީހާ ދަންނައެވެ.
އެމީހެއްގެ އަތުގައިވާ އެއްޗަކަށް ވުރެވެސް ބޮޑަށް ﷲ ތަޢާލާގެ އަތްޕުޅުގައިވާ އެއްޗަކާމެދު އޮންނަ ޔަޤީންކަން އިތުރުކުރާށެވެ.
"خطوات إلى السعادة لد. عبدالمحسن القاسم (ص: 46)"
- ޝައިޚް ޢިމްރާން މުޙައްމަދު ޢަލީ
