ރޭއަޅުކަމުގެ ވަޤުތަކީ ރޭގަނޑުގެ ފަހުދަންފަޅީގެ ވަޤުތު ކަމުގައި ﷲ ތަޢާލާ ލައްވަވާފައިވާ ސަބަބުތައް ވަރަށް ގިނައެވެ. އެއިގެ ތެރެއިން އެންމެ މުހިންމު ބައެއް ސަބަބުތައް ބަޔާންކޮށްލެވޭތޯ މަސައްކަތްކޮށްލާނަމެވެ. އިން ޝާ ﷲ
ދުވާލުގެ ނަމާދުތަކަށް ބަލައިފިނަމަ ނަމާދުކުރަމުންގެންދާއިރު ނުވަތަ ނަމާދަށް ހުންނައިރުގައިވެސް ނަމާދު ނިމިގެން ދެންކުރަން ހުންނަ ކަންކަމަށް ނުވިސްނަން މަސައްކަތްކުރިނަމަވެސް ގިނަބައަކަށް ވިސްނޭނެއެވެ. އަދި ދުވާލުގެ ނަމާދުތައް ކުރަނީ ކުރަން ހުންނަ މަސައްކަތްތައް ޤުރްބާން ކޮށްފައެވެ. އެކަންކަމުގެ ސަބަބުން ޚުޝޫޢަތްތެރިކަން ކުޑަވެގެންދާނެއެވެ. އެކަން ﷲ ތަޢާލާ އެންމެ މޮޅަށް ދެނެވޮޑިގެންވެއެވެ.
ރޭގަނޑުގެ ފަހުބައިގައި ތެދުވުމުން އެބާވަތުގެ އެއްވެސް ކަމަކަށް ވިސްނާކަށް ނުޖެހޭނެއެވެ. އެދުވަހު ކުރަންޖެހުނު ކަންކަން ހުންނާނީ ކުރެވިފައެވެ. އަދި އިރާކޮޅުން ފެށިގެން ނިދައިލުމުން ސިކުނޑި ހުންނާނީ ތާޒާވެފައެވެ. ވީމާ ދަމުނަމާދަށް ހުންނައިރު ﷲ ތަޢާލާގެ ޙަޟްރަތާއިމެދު ވިސްނުމުގެ ފުރުޞަތު އޮންނާނީ ވަރަށް ބޮޑަށް ފަހިވެފައެވެ.
ﷲ ތަޢާލާ ލޯބިވެވ ވޮޑިގަންނަވަނީ ނަމާދަށް ހުންނައިރު ވީހައި ބޮޑަށް ޚުޝޫޢަތްތެރިވުމަށެވެ. ހަމައެކަނި ނަމާދުގައި ކިޔާތަކެއްޗަށާއި ﷲ ތަޢާލާގެ ޙަޟްރަތާއިމެދު ވިސްނައިގެން ނަމާދުކުރުމަށެވެ. ވިމާ މިބަޔާންކުރި ސަބަބުތަކަށް ބެލިނަމަވެސް ﷲ ތަޢާލާ އެންމެ ބޮޑަށް ރުހިވޮޑިގަންނަވާނެ ގޮތަށް ކުރުމުގެ ފުރުޞަތު އެންމެ ބޮޑީ ދަމުނަމާދުގައިކަން އެނގިގެންދެއެވެ.
ރޭގަނޑުގެ އިރާކޮޅުން ފެށިގެން ނިދާފައި ހޭލައިގެން ދަމުނަމާދުކުރާނަމަ ޤުރްބާންކުރަން ޖެހޭނީ ނިދިން މިންވަރެކެވެ. އެހެން އެއްވެސް ކަމެއް ޤުރްބާންކުރާކަށް ނުޖެހޭނެއެވެ. ނިދިން އުނިވެގެންދާބައިގެ ބަދަލުގައި ﷲ ތަޢާލާ އެމީހަކަށް ހެޔޮ ރަޙްމަތް ލެއްވެވުމުން ކުރާ ފައިދާ މާބޮޑުވާނެއެވެ. ނިދިން ބައެއް މަދުވިކަން އިޙްޞާޞްވެސް ނުކުރެވޭނެއެވެ. އިން ޝާ ﷲ
މިފަދަ ހުރިހާ ކަމަކަށް ވިސްނުމުންވެސް އެނގެނީ މީސްތަކުން ރޭގަނޑުގެ ފަހުދަންފަޅީގައި ހޭލައި ރޭއަޅުކަންކުރުމަށް ﷲ ތަޢާލާ ލޯބިވެވޮޑިގަންނަވާ މިންވަރެވެ. އެވަރުގެ މަތިވެރި އަޅުކަމެއް ނުކޮށް ފަރުވާކުޑަކުރަން ހެޔޮވާނީވެސް ކިހިނަކުން ހެއްޔެވެ؟
- މަޢްލޫމާތު: އިމާމް ޢުމަރު ސުލައިމާންގެ ދަރުސަކުން
