މާލޭގެ ރައްޔިތުންނަށް ގޯތި ދޫކުރުމަށްޓަކައި ހިއްކަމުންދާ ގިރާވަރުފަޅުގެ މަސައްކަތްތައް ތިން ޑްރެޖަރު ބޭނުންކޮށްގެން ވަރަށް ހަލުވި ދުވެއްޔެއްގައި ކުރިއަށްދާކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހާމަކޮށްފިއެވެ. މިކަން ހާމަކުރެއްވީ އެ ކުންފުނީގެ ސީއީއޯ އަދި މެނޭޖިންގ ޑިރެކްޓަރ އިބްރާހިމް ޝަރީފެވެ.
ޝަރީފް ވިދާޅުވީ ގިރާވަރުފަޅުގެ ބައެއް ސަރަޙައްދުތަކަކީ ވަރަށް ފުން ސަރަޙައްދުތަކެއް ކަމުން، ބިން ހިއްކުމުގެ މަސައްކަތުގައި ބޮޑެތި ގޮންޖެހުންތަކެއް ކުރިމަތިވަމުންދާ ކަމަށެވެ. ނަމަވެސް އެ ގޮންޖެހުންތަކާއެކުވެސް މަޝްރޫޢުގެ މަސައްކަތްތައް ބާރު ދުވެލީގައި ކުރިއަށް ގެންދިއުމަށް ޚާއްޞަ އިސްކަމެއް ދީގެން މަސައްކަތް ކުރަމުންދާ ކަމަށް އޭނާ ފާހަގަކުރެއްވިއެވެ.
މަސައްކަތުގެ ދުވެލި އަވަސްކުރުމަށްޓަކައި މިހާރު އެ ސަރަޙައްދުގައި ޖުމުލަ ތިން ޑްރެޖަރު ބޭނުންކުރަމުންދާ ކަމަށް އެމްއޭސީއެލްގެ ސީއީއޯ ވިދާޅުވިއެވެ. "މަސައްކަތްތައް ހަލުވިކުރުމަށް، މި މަސައްކަތުގައި 3 ޑްރެޖަރު ބޭނުންކުރަމުންދަނީ. އެންމެ ބޮޑު ގޮންޖެހުމަކީ ފަޅުގެ ފުންކަން" ޝަރީފް ވިދާޅުވިއެވެ.
ގިރާވަރުފަޅުން ޖުމުލަ 167.15 ހެކްޓަރުގެ ބިން ހިއްކުމަށް ހަމަޖެހިފައިވާއިރު، އޭގެ ތެރެއިން އެމްއޭސީއެލްއާ ހަވާލުކޮށްގެން ހިއްކަމުންދަނީ ނުނިމި އޮތް 97.15 ހެކްޓަރުގެ ބިމެވެ. ނިމިދިޔަ ސަރުކާރުގެ ދައުރު ނިމުނުއިރު އެ ފަޅުން ހިއްކާ ނިމިފައިވަނީ 70 ހެކްޓަރުގެ ބިމެވެ.
މި މަޝްރޫޢަކީ މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދުމަށް ސަރުކާރުން ކުރިއަށްގެންދާ މުހިންމު މަޝްރޫޢެކެވެ. ފަޅުގެ ފުން ސަރަޙައްދުތައް ހިއްކުމުގައި ހުރި ދަތިތަކާއެކުވެސް، އެމްއޭސީއެލްއިން އަމާޒު ހިފާފައިވަނީ ކަނޑައެޅިފައިވާ ތާވަލާ އެއްގޮތަށް މަސައްކަތް ނިންމުމަށެވެ.
