ރާއްޖެއަށް ބޭނުންވާ ކާބޯތަކެއްޗާއި، ތެލާއި އަދި ބޭސްފަދަ ޒަރޫރީ ތަކެތި ފަސޭހަކަމާއެކު މެދުނުކެނޑި ލިބޭނެ އިންތިޒާމްތައް ހަމަޖެއްސުމަށްޓަކައި ބައެއް ޤައުމުތަކާއެކު ރަސްމީ މަޝްވަރާތައް ފަށާފައިވާ ކަމަށް ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވެއްޖެއެވެ.
މިއަދު ހަވީރު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު ވިދާޅުވީ، ރާއްޖެއަށް ބޭނުންވާ މިފަދަ މުހިއްމު ތަކެތި ލިބޭނެ އިތުރު މަގުތައް ހޯދުމަށް ސަރުކާރުން ޚާއްސަ މަސައްކަތްތަކެއް ކުރަމުންދާ ކަމަށެވެ. މި މަސައްކަތުގެ ދަށުން އެކަމަށް ޚާއްސަ ޓީމެއް ދާދިފަހުން ސްރީލަންކާގެ ކޮލަމްބޯއަށް ގޮސް ބައެއް މަޝްވަރާތައް ކުރިއަށް ގެންގޮސްފައިވާ ކަމަށްވެސް ވަޒީރު ފާހަގަކުރެއްވިއެވެ.
ޚާރިޖީ ވަޒީރު އިތުރަށް ވިދާޅުވީ، އިޤްތިޞާދަށް ލިބޭ ގެއްލުންތަކުން އަރައިގަތުމަށްޓަކައި ސަރުކާރުން ޚަރަދު ކުޑަކުރުމުގެ ފިޔަވަޅުތައް މިހާރުވެސް އަޅަން ފަށާފައިވާ ކަމަށެވެ. އެގޮތުން އެންމެ އިސްކަންދޭ ދާއިރާތަކަށް މުހިއްމުކަން ދީގެން، ޚަރަދުތައް ރިވިއުކޮށް އިޤްތިޞާދީ ހަމަޖެހުން ޤާއިމްކުރުމަށް މަސައްކަތް ކުރަމުންދާ ކަމަށް ވަޒީރު ވިދާޅުވިއެވެ.
މި މަޝްވަރާތަކުގެ މައިގަނޑު ބޭނުމަކީ ބޭރުގެ ބާޒާރުތަކުން ރާއްޖެއަށް ބޭނުންވާ އަސާސީ މުދާ ހޯދުމުގައި ހުރި ދަތިތައް ނައްތާލައި، އެއްވެސް މެދުކެނޑުމެއް ނެތި ރައްޔިތުންނަށް ބޭނުންވާ ޚިދުމަތްތަކާއި ތަކެތި ފޯރުކޮށްދިނުން ކަމަށް ސަރުކާރުން ހާމަކުރެއެވެ.
