ރާއްޖެ ދަތުރުފަތުރުގެ ނިޒާމުން ގުޅާލުމަށް ސަރުކާރުން ކުރިއަށްގެންދާ ރޭގަނޑު އާރްޓީއެލް (އާރްޓީއެލް) ހައިސްޕީޑް ފެރީގެ ޚިދުމަތް، މާދަމާ ލ. އަތޮޅުގައި ފެށުމަށް ހުރިހާ ތައްޔާރީތަކެއް ވެއްޖެއެވެ.
ރާއްޖޭގެ ރަށްތަކުގައި އާރްޓީއެލް ހައިސްޕީޑް ފެރީގެ ޚިދުމަތް ދެމުންދަނީ، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ޙަވާލުކޮށްގެންނެވެ. އެމްޓީސީސީން ވިދާޅުވީ، ލ. އަތޮޅުގައި މި ޚިދުމަތް ރަސްމީކޮށް ފަށާނީ މާދަމާ އެ އަތޮޅުގައި ބާއްވާ ޚާއްޞަ ރަސްމިއްޔާތަކަށް ފަހުގައެވެ.
މި ޚިދުމަތް ފެށުމުގެ ކުރިން އާންމުން ހޭލުންތެރިކުރުވުމުގެ ގޮތުން އެމްޓީސީސީން ވަނީ އިއްޔެ ލ. ދަނބިދޫ އަދި މާބައިދޫގައި ޚާއްސަ ސެޝަންތަކެއް ބާއްވާފައެވެ. މި ސެޝަންތަކުގެ މަގްސަދަކީ ފެރީގެ ދަތުރުތައް ރޭވިފައިވާ ގޮތާއި، ޓިކެޓް ނެގުމުގެ ކަންކަން ހުންނާނެ ގޮތުގެ މައުލޫމާތު ރައްޔިތުންނަށް ފޯރުކޮށްދިނުމެވެ.
ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން މިމަހުގެ ކުރީކޮޅު ވިދާޅުވެފައިވަނީ، މި ހިނގާ މާރިޗު މަސް ނިމުމުގެ ކުރިން ލ. އަތޮޅާއި މ. އަތޮޅުގައި އާރްޓީއެލްގެ ޚިދުމަތް ފެށުމަށް މަސައްކަތް ކުރަމުންދާ ކަމަށެވެ. މާދަމާ ލ. އަތޮޅުގައި ޚިދުމަތް ފަށާއިރު، މިއީ މި ސަރަހައްދުގެ ދަތުރުފަތުރަށް ލިބިގެންދާނެ ބޮޑު ލުޔެކެވެ.
އާރްޓީއެލް ފެރީގެ ޚިދުމަތް އެންމެ ފަހުން ފަށާފައިވަނީ ފ. އަތޮޅާއި ދ. އަތޮޅުގައެވެ. ސަރުކާރުގެ އަމާޒަކީ މުޅި ރާއްޖެ އެއް ދަތުރުފަތުރުގެ ނިޒާމަކުން ގުޅާލައި، ރައްޔިތުންނަށް ފަސޭހަކަމާއެކު ދަތުރުކުރެވޭނެ މަގު ފަހިކޮށްދިނުމެވެ.
