އިންތިޚާބުގައި ނުފޫޒުން އެއްކިބާވެ، އަމިއްލަ އިޚްތިޔާރުގައި ވޯޓުލުމަށާއި، ވޯޓުގެ މަސައްކަތްތަކަށް ހުރަސްއެޅޭ ފަދަ އެއްވެސް ކަމެއް ނުކުރުމަށް ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރުސީއެމް) އިން މިއަދު އިލްތިމާސްކޮށްފިއެވެ.
ޕީއެސްއެމް ނިއުސްއަށް ދެއްވި އިންޓަވިއުއެއްގައި އެ ކޮމިޝަނުގެ ރައީސް ޑރ. ޢާއިޝަތު ރަމީލާ ވިދާޅުވީ، ވޯޓުލުމުގެ ޙައްޤަކީ ކޮންމެ ރައްޔިތަކު އަދާކުރަންޖެހޭ މުހިއްމު ޒިންމާއެއް ކަމަށާއި، އެ ޙައްޤު ފުރިހަމަކަމާއެކު އަދާކުރުމަކީ ކޮންމެހެން ބޭނުންތެރި ކަމެއް ކަމަށެވެ. އަދި ކޮންމެ މީހަކު ލާ ވޯޓަކީވެސް އެމީހަކު އަމިއްލަ އިޚްތިޔާރުގައި، ތިމާ ބޭނުންވާ ކެންޑިޑޭޓަކަށް ދޭ ވޯޓަކަށް ހަދަންޖެހޭނެ ކަމަށް ވެސް އެކަމަނާ ފާހަގަކުރެއްވިއެވެ.
އިންތިޚާބުގެ ވޯޓުލުން ކުރިއަށްދާއިރު، އެހެން މީހުންގެ ޙައްޤުތަކަށް ހުރަސްއެޅޭ ފަދަ އެއްވެސް ކަމެއް އެއްވެސް ފަރާތަކުން ނުކުރުމަށް ޑރ. ރަމީލާ ވަނީ ހަރުކަށިކޮށް ގޮވާލައްވައިފައެވެ. މީގެ އިތުރުން، ވޯޓުލާ ވަގުތާއި، ވޯޓު ގުނުމުގެ މަރުޙަލާގެ އިތުރުން އިންތިޚާބަށްފަހު ވެސް މުޖުތަމަޢުގެ މަޞްލަޙަތު އިސްކުރުމަށް އެކަމަނާ އެދިވަޑައިގެންނެވިއެވެ.
ޑރ. ރަމީލާގެ ވާހަކަފުޅުގައި، އިންތިޚާބާ ގުޅިގެން އެކުވެރިކަމާއި އިޙްތިރާމުގެ ސިފަތައް ކުރިއަށްނެރުމުގެ މުހިއްމުކަން ފާހަގަކުރެއްވިއެވެ. އަދި އެއްވެސް ކަމެއްގައި ދެބަސްވުމެއް އުފެދިއްޖެ ނަމަ، އެކަމެއް ޤާނޫނީ އިމުގެ ތެރެއިން ޞުލްހަވެރިކަމާއެކު ޙައްލުކުރުމަށް ވެސް އެޗްއާރުސީއެމްގެ ރައީސް ވަނީ އިލްތިމާސްކުރައްވައިފައެވެ.
