މިޒަމާނުގައި ރަނގަޅު ފިރިއަކު ލިބިދާނެތޯ؟ 2 ކައިވެނީގައި ނިކަމެތިކަން ލިބުމުން މިހުންނަނީ އިތުރު ކައިވެންޏެއް ކުރަންވެސް ބިރުން!
ކިޔުންތެރިޔާއަށް ދަންނަވާލަން އޮތީ ރަނގަޅު ފިރިންނާއި ރަނގަޅު އަނބިން މިޒަމާނުގައިވެސް އެބަތިއްބެވެ. މައްސަލައަކަށްވެގެން މިއުޅެނީ މަދުކަމެކެވެ. މިއީ އަނެކާ ކުށްވެރިކޮށްގެން ޙައްލުކުރެވެން އޮތް ކަމެއް ނޫނެވެ. ދެމީހުންވެސް ސަމާލުކަންދީ ރަނގަޅު ގޮތުގައި އެކުގައި ދިރިއުޅެން މަސައްކަތްކޮށްގެން ނޫނީ ޙައްލެއް ނުފެންނާނެއެވެ.
ހަމައެއާއިއެކު ތިމާގެ ކުށެއްނެތި ކައިވެނިރޫޅިއްޖެނަމަ އޮތީ އުފާކުރުމެވެ. އެއީ އޭނާއަށްވުރެ ރަނގަޅު ބައިވެރިއަކު ދެއްވަވާނެތީއެވެ. އިން ޝާ ﷲ. ހަމަ އެއާއިއެކު އެކަމުގައި ތިމާގެ އިހްމާލެއްވާނަމަ އެކަން އިޞްލާޙްކުރަންވާނެއެވެ. ގިނަ ކައިވެނިކުރަންޖެހުމަކީ މައްސަލައެއް ނޫނެވެ. ތިބާއަށް ރަނގަޅު ފިރިއަކު ދެއްވަވާނީ ކިތައްވަނައަށް ކަމެއް ނުއެނގޭނެއެވެ. ޔަޤީންކުރަންވީ ދެއްވަވާނެ ކަމެވެ. ވީމާ ކައިވެނިނުކޮށް ނުހުންނާށެވެ.
ތިރީގައިއެވަނީވެސް އަނބިމީހާއަށް ޚިދުމްތަކުރުމުގައި ނަމޫނީ ފިރިއެއްގެ ވާހަކައާއި ރަނގަޅުނޫން ފިރިއަކު އިޞްލާޙްވީގޮތުގެ ވާހަކައެވެ.
ގިނަ ބައެއް ފަދައިން އަޅުގަނޑުމެން ދެމީހުންވެސް ކައިވެނިކުރީ ވަރަށް ލޯބިން ދުވަސްތަކެއްވަންދެން އެކުގައި އުޅަފައެވެ. ނަމަވެސް އެކުގައި ދިރިއުޅެން ފެށިތަނާހެން މައްސަލަތައް ޖެހެން ފަށައިފިއެވެ. އެންމެ ބޮޑު މައްސަލައަކަށްވަނީ ބަލިވުމުން ފިރިމީހާގެ އެހީތެރިކަން ނުލިބޭ ކަމެވެ.
އަޅުގަނޑަކީ ދޭތެރެއަކުން ބަނޑުގައި ރިއްސާ އަންހެނަކީމެވެ. މައްސަރު ކަންތައް ޖެހެން ކައިރިވުމުން އެކަން ބޮޑުވެއެވެ. ވީމާ އަޅުގަނޑަށް އޮށޯވެ އޮންނަން ޖެހޭލެއް ގިނަކަމުން ފިރިމީހާ ފޫހިވަނީއެވެ. ގިނަގިނައިން އެހީތެރިވާންޖެހުމުން ފަރުވާކުޑަކުރެވެނީއެވެ.
ބަނޑުގައި ރިއްސާ ބައެއް ދުވަސްދުވަހު އެނދުން އެއްގޮތަކަށްވެސް ނުތެދުވެއެވެ. ރިއްސާލެއް ގަދަކަމުން ތެދުވާއިރަށް މޫނުމައްޗަށް އަނދިރިވެ ވެއްޓޭފަހަރުވެސް އަންނާތީ ތެދުވާން ނުކެރެނީއެވެ. ޑޮކްޓަރުންނަށް ކުރެވޭ މާބޮޑު ކަމެއް އޮންނަ ކަމަކަށްވެސް ނުވެއެވެ.
ކޮންމެއަކަސް އެއްރޭ ފިރިމީހާގެ ރައްޓެސަކާއި ބައްދަލުކުރަން ގެއަކަށް ދިއައިމެވެ. ފެނުނީ މުސްކުޅި އަންހެނަކު އެނދުގައި ބާއްވައިގެން ކައިރީގައި އޭނާގެ ފިރިމީހާ އިނދެގެން ކުޑަކުޑަ ސަމުސަލަކުން ލޯބިން ބަތްޕެންފަދަ އެއްޗެއް ވަރަށް ލަސްލަހުން އަނގައަށް އަޅައިދީގެން ބޯންދޭތަނެވެ. އެކަމަށް އެތައް ވަގުތެއް ހޭދަކުރިއިރުވެސް އޭނާ އިންނަނީ ހަމައުފަލުން ހެވިގެންނެވެ.
އެކުވެރިޔާ ބުނީ އެއީ އޭނާގެ މަންމަ އާއި ބައްޕަ ކަމަށެވެ. މަންމަ ބަލިވެ އެނދުގައި އޮންނަތާ 13 އަހަރުވެއްޖެކަމަށެވެ. ނަމަވެސް ބައްޕަ ނޫން މީހަކު މަންމައަށް ކާންދީފިނަމަ ރުޅިވެސް އަންނާނެ ކަމަށެވެ. "ބުނާނެ ކަލޭމެން އުޅޭނީ މާއަވަސްއަރުވާލައިގެންނޭ! މަންމަ ކޮށިއަރައިފާނޭ!"
އެކުވެރިޔާ ބުނީ ނަމާދަށް ނޫންތަނަކަށް ބައްޕަ ގެއިން ބޭރަށްވެސް ނުދާނެކަމަށާއި ގެއަށް އައުމަށްފަހު އަބަދުވެސް އުޅޭނީ މަންމައަށް ފެންނަ ހިސާބުގައި ކަމަށެވެ. އިރުއިރުކޮޅުން މަންމަގެ ގައިގައި ފިރުމައި ހަދާނެ ކަމަށެވެ.
އެވާހަކަތައް ކިޔައިދެމުން ދިއައިރު އަޅުގަނޑަށް ވަރަށް ގިނައިން ފިރިމީހާގެ ގައިގއި ވިކައިހެދުނެވެ. ނަމަވެސް އެއްވެސް އެއްޗެއް ނުބުނަމެވެ. ފިރިމީހާވެސް ބަހެއް ނުބުނެއެވެ. ވަރަށް ޝައުޤުވެރިކަމާއިއެކު އަޑުއެހިއެވެ.
އަލްޙަމްދުލިﷲ! އެއިގެ ފަހުން ފިރިމީހާ މުޅިން ބަދަލުވިއެވެ. ބަނޑުގައި ރިއްސާތީ އޮށޯވެއޮންނަންޖެހޭ ދުވަސްދުވަހު ވަރަށް ބޮޑަށް އަޅައިލައެވެ. އެހީތެރިވެއެވެ. ބަލިވާ ދުވަސްދުވަހު ނުކައި ބަނޑަށް އޮންނާކަށްވެސް ނުޖެހެއެވެ!
އެބަލިން އަޅުގަނޑަށް ސަލާމަތްކަން ލިބުނީ ކައިވެންޏަށް 7 ވަނައަހަރު ދަރިއަކުލިބުމުންނެވެ. ދަރިފުޅު ލިބުނުފަހުން އެގޮތަކަށް ނުރިއްސައެވެ. ނަމަވެސް ކޮންމެވެސް ވަރެއްގެ އުނދަގޫތަކެއް އަދިވެސް ހުރެއެވެ.
ދުޢާއަކީ ހުރިހާ ފިރިންނާއި އަނބިންނަށްވެސް އަޅުގަނޑުގެ މިވާހަކަކޮޅުން ޢިބްރަތެއް ޙާޞިލުވުމެވެ. ގދަވެސަލާމަތުން ހުންނައިރު ލޯބިވެފައި ބަލިވުމުން ލޯބިނުވާބަލިން އެންމެން ސަލާމަތްވުމެވެ.
- ޒީނާ / މިއަދުނޫހުގެ ކިޔުންތެރިއެއް
