މޯލްޑިވްސް އިމިގްރޭޝަނުން ދެމުންގެންދާ ޚިދުމަތްތައް އިތުރަށް ހަރުދަނާކޮށް، ރައްޔިތުންނަށް ލުއިފަސޭހަ ކޮށްދިނުމުގެ ގޮތުން ދިވެހި ޕާސްޕޯޓާ ގުޅުންހުރި މުހިންމު ތިން ޚިދުމަތެއް "އިމުގާ" ޕޯޓަލް މެދުވެރިކޮށް އޮންލައިންކޮށް ލިބޭނެ އިންތިޒާމު ހަމަޖައްސައިފިއެވެ.
މޯލްޑިވްސް އިމިގްރޭޝަނުން މައުލޫމާތު ދެއްވާ ގޮތުގައި، މިހާރު މުޅިން އަލަށް އިމުގާ ޕޯޓަލްއަށް ބަދަލުކޮށްފައިވާ ތިން ޚިދުމަތަކީ:
ޕާސްޕޯޓް ކަލެކްޝަން ޕޮއިންޓް (ޕާސްޕޯޓާ ހަވާލުވާން ބޭނުންވާ ތަން) ބަދަލުކުރުމަށް ހުށަހެޅުން. ޕާސްޕޯޓުގެ ކޮޕީއަކަށް އެދި ހުށަހެޅުން. ކުރީގެ ޕާސްޕޯޓުގެ ތަފްސީލު ހޯދުމަށް އެދުން.
މީގެކުރިން ޕާސްޕޯޓް ކަލެކްޝަން ޕޮއިންޓް ބަދަލުކުރަން ބޭނުންވާ ނަމަ، އެކަމަށް އެދި އިމިގްރޭޝަނަށް ސިޓީއެއް ފޮނުވަން ޖެހެއެވެ. ނަމަވެސް، އަލަށް ގެނެވުނު ބަދަލާއެކު އިމުގާ ޕޯޓަލްގައިވާ "ދިވެހި ޕާސްޕޯޓާ ބެހޭ ބައި" ގެ ތެރެއިން "އިތުރު ޚިދުމަތްތައް" ޚިޔާރުކޮށްގެން ފަސޭހަކަމާއެކު މިކަމަށް މިހާރު އެދެވޭނެއެވެ.
"އިމުގާ" ޕޯޓަލްއަކީ ރައްޔިތުންނަށް ވީހާވެސް ގާތުން އަދި އަވަސްކަމާއެކު ޚިދުމަތް ފޯރުކޮށްދިނުމަށްޓަކައި 2020 ވަނަ އަހަރު އިމިގްރޭޝަނުން ތައާރަފުކުރި ޕްލެޓްފޯމެކެވެ. މި ޕޯޓަލް މެދުވެރިކޮށް ޕާސްޕޯޓުގެ ޚިދުމަތްތަކުގެ އިތުރުން، އެކި ބާވަތުގެ ވިސާތަކަށް ހުށަހެޅުމުގެ ފުރުސަތުވެސް އޮވެއެވެ.
މި ބަދަލަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ސަރުކާރުގެ ޚިދުމަތްތައް ޑިޖިޓަލްކޮށް، ރައްޔިތުންނަށް ލުއިފަސޭހަ މަގުތައް ފަހިކޮށްދިނުމަށް ކުރަމުންދާ މަސައްކަތުގެ ތެރެއިން އެޅުނު މުހިންމު ފިޔަވަޅެކެވެ. އިމިގްރޭޝަނުން ވިދާޅުވީ، އެ މުއައްސަސާގެ މަގުސަދަކީ ޒަމާނީ ވަސީލަތްތައް ބޭނުންކޮށްގެން ޚިދުމަތް ހޯދާ ފަރާތްތަކަށް ވީހާވެސް ބޮޑު ލުޔެއް ހޯދައިދިނުން ކަމަށެވެ.
