ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026ގެ ދެވަނަ ބުރުގެ ވޯޓުގެ ރަސްމީ ނަތީޖާ އިލެކްޝަންސް ކޮމިޝަނުން މިއަދު އިޢުލާންކޮށްފިއެވެ. މި ބުރުގައި ވޯޓުލުން ކުރިއަށްދިޔަ 5 ދާއިރާގެ ތެރެއިން 3 ދާއިރާއެއްގެ ގޮނޑި ކާމިޔާބުކޮށްފައިވަނީ ސަރުކާރު ހިންގާ ޕީޕަލްސް ނޭޝަނަލް ކޮންގްރެސް (ޕީއެންސީ) އިންނެވެ.
ޕީއެންސީން ކާމިޔާބުކުރި ގޮނޑިތަކުގެ ތެރޭގައި ހއ. ކެލާ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސްގެ މަޤާމާއި، ހދ. ނޭކުރެންދޫ އަދި ލ. މާވަށު އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުކަމުގެ ގޮނޑި ހިމެނެއެވެ. އެގޮތުން ކެލާ އ.ތ.މ ކޮމިޓީގެ މެންބަރުކަމަށް 578 ވޯޓާއެކު ހައްވާ ފަޒްނާ އިންތިޚާބުވިއިރު، ނޭކުރެންދޫ އ.ތ.މ ކޮމިޓީގެ މެންބަރުކަމަށް 362 ވޯޓާއެކު އިންތިޚާބުވީ ފާތިމަތު ރިއުޒާއެވެ. އަދި މާވަށު ކޮމިޓީގެ މެންބަރުގެ މަޤާމު ފާތިމަތު ޝާފިޔާ ކާމިޔާބުކުރީ 563 ވޯޓާއެކުގައެވެ.
މި އިންތިޚާބުގައި އިދިކޮޅު އެމްޑީޕީން ވަނީ އެއް ގޮނޑި ކާމިޔާބުކޮށްފައެވެ. އެއީ ބ. ދޮންފަނު ކައުންސިލްގެ އަންހެނުންނަށް ޚާއްސަކޮށްފައިވާ ގޮނޑިއެވެ. މި ގޮނޑި އެމްޑީޕީގެ ކެންޑިޑޭޓް އައިމިނަތު ރަފާޙް ކާމިޔާބުކުރީ 203 ވޯޓު ހޯދައިގެންނެވެ.
މީގެ އިތުރުން ފުވައްމުލައް ސިޓީ ދަނޑިމަގު ދާއިރާގެ މެންބަރުގެ ގޮނޑި ކާމިޔާބުކުރީ އަމިއްލަ ގޮތުން ވާދަކުރި ކެންޑިޑޭޓް ޝީޒާ އިބްރާހީމެވެ. އޭނާ މި ގޮނޑި ކާމިޔާބުކުރީ 595 ވޯޓު ހޯދައިގެންނެވެ. އިލެކްޝަންސް ކޮމިޝަނުން މިހާރު ވަނީ މި ހުރިހާ ދާއިރާތަކެއްގެ ނަތީޖާ ރަސްމީކޮށް ކަށަވަރުކޮށްދީފައެވެ.
