ދައުލަތުގެ އައު ޕޭ ފްރޭމްވަރކަށް ހިޖުރަކުރި މުއައްސަސާތަކަށް ދެނެގަނެވިފައިވާ ގޮންޖެހުންތަކާއި މައްސަލަތައް ހައްލުކުރުމުގެ މަސައްކަތް ކުރަމުން އަންނަކަމަށް ނޭޝަނަލް ޕޭ ކޮމިޝަނުން ހާމަކޮށްފިއެވެ. މިއީ ދައުލަތުގެ މުސާރަތައް އެއްހަމަކުރުމަށް ސަރުކާރުން ކުރިއަށްގެންދާ އިސްލާހީ މަސައްކަތުގެ ތެރެއިން ކުރަމުންދާ ކަމެކެވެ.
ޕޭ ކޮމިޝަނުން ބުނީ، ޕޭ ފްރޭމްވަރކަށް މިހާތަނަށް ހިޖުރަކޮށްފައިވާ މުއައްސަސާތަކުން ދެނެގަނެވިފައިވާ ގޮންޖެހުންތަކާއި މައްސަލަތައް ހައްލުކުރުމުގެ މަސައްކަތް ހުއްޓުމެއް ނެތި ކުރިއަށްދާ ކަމަށެވެ. "މުސާރާއިގެ އޮނިގަނޑުގައި ހުރި މައްސަލަތައް ހައްލުކުރުމުގެ މަސައްކަތް އެބަކުރަން،" ކަމަށް އެ ކޮމިޝަނުން ބުނެފައިވެއެވެ.
ދައުލަތުގެ މުސާރައިގެ ސިޔާސަތުގެ ޤާނޫނުގެ ދަށުން ސިވިލް ސަރވިސް އާއި ޝަރުޢީ ދާއިރާގެ މުވައްޒަފުން ޕޭ ފްރޭމްވަރކަށް ހިޖުރަކޮށްފައިވަނީ ނޮވެމްބަރ 1، 2025 ގައެވެ. އޭގެ ފަހުން ދައުލަތުގެ އިތުރު ހަ މުއައްސަސާއެއް މި އޮނިގަނޑަށް ބަދަލުކޮށް ނިމުމާއެކު، މިހާރު ޖުމްލަ 93 އިންސައްތަ މުއައްސަސާ ވަނީ މި ފްރޭމްވަރކާ ގުޅިފައިކަމަށް ކޮމިޝަނުން މައުލޫމާތު ދެއެވެ.
ޕޭ ކޮމިޝަނަށް ހުށަހެޅިފައިވާ ކަންބޮޑުވުންތަކާއި މައްސަލަތައް ބަލައި، އެކަމާ ގުޅުންހުރި އިދާރާތަކާ މަޝްވަރާކޮށް، އެކަންތައްތަކަށް ދާއިމީ ހައްލެއް ހޯދުމުގެ މަސައްކަތް މިހާރުވެސް ދަނީ ކުރެވެމުންނެވެ. މީގެ ބޭނުމަކީ މުވައްޒަފުންގެ މުސާރައާއި އިނާޔަތްތަކުގައި ހުރި ފަރަގުތައް ކުޑަކޮށް، އިންސާފުވެރި ނިޒާމެއް ގާއިމުކުރުމެވެ.
ނޭޝަނަލް ޕޭ ކޮމިޝަނުން އިތުރަށް ފާހަގަކުރި ގޮތުގައި، ބާކީ ހުރި މުއައްސަސާތައް ޕޭ ފްރޭމްވަރކަށް ބަދަލުކުރުމުގެ މަސައްކަތް ކުރިއަށް އޮތް ތަނުގައި ނިންމުމަށް ދަނީ ތައްޔާރުވަމުންނެވެ. މިގޮތުން ބާކީ ހުރި މުއައްސަސާތައް މި އޮނިގަނޑަށް ބަދަލުކުރުމަށްޓަކައި ވާންޖެހޭ ފަންނީ ތައްޔާރީތަކުގެ މަސައްކަތްވެސް ބާރުސްޕީޑުގައި ކުރިއަށްދާކަމަށް އެ ކޮމިޝަނުން ބުންޏެވެ.
