ދިވެހިރާއްޖޭގެ އިޤްތިސާދީ ގޮތުންނާއި، އިޖްތިމާޢީ ގޮތުންނާއި، ޓެކްނޮލޮޖީގެ ގޮތުން ބެލިކަމުގައިވީ ނަމަވެސް ރާއްޖެ ބާރުމިނުގައި ކުރިއަރަމުން އަންނަކަމަށް އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ. ވަޒީރު މިހެން ވިދާޅުވީ ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ ދަސްވެނިވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ރާއްޖޭގެ އިޤްތިސާދު ކުރިއަރުވައި، އިތުރަށް ފުޅާކުރުމަށްޓަކައި ދިވެހީންގެ ސަޤާފަތާއި، އުސޫލުތަކާއި މިނިވަންކަން މުހިންމު ދައުރެއް އަދާކުރާ ކަމަށް ވަޒީރު ފާހަގަކުރެއްވިއެވެ. އަދި ޤައުމު ބިނާކުރުމުގެ މިފަދަ މުހިންމު މަސައްކަތްތަކުގައި މިއަދު ދަސްވެނިވާ ދަރިވަރުންގެ ދައުރު ނުހަނު ބޮޑުކަމަށްވެސް ވަޒީރު ވިދާޅުވިއެވެ.
ވަޒީރު ސަޢީދު އިތުރަށް ވިދާޅުވީ، ޤައުމަށް ޚިދުމަތް ކުރުމަށް ބޭނުންވަނީ ތަޢުލީމީ ޤާބިލު މީހުން ކަމަށެވެ. އަދި ކޮންމެ ދާއިރާއަކުން މަތީ ތަޢުލީމު ހާސިލްކުރި ނަމަވެސް، ކޮންމެ ކުއްޖަކުވެސް މަސައްކަތް ކުރަންވާނީ ޤައުމަށް އެންމެ ފައިދާވާނެ ގޮތަށް އިސްކަންދީގެން ކަމަށް ވަޒީރު ނަސޭހަތްތެރިވެވަޑައިގެންނެވިއެވެ.
ދަރިވަރުންނާ މުޚާތަބު ކުރައްވައި ވަޒީރު ވިދާޅުވީ، "އަޅުގަނޑުމެންގެ ސިޔާދަތާއި، އަޅުގަނޑުމެންގެ ސަޤާފަތާއި، އަޅުގަނޑުމެންގެ އުޞޫލުތަކާއި، އަޅުގަނޑުމެންގެ މިނިވަން ކަމަކީ އަޅުގަނޑުމެންގެ ތަރައްޤީގެ ބިންގަލަކަށް ވާންޖެހޭ. މި މެސެޖު ތިޔަ ކޮންމެ މީހަކަށް ވެސް އެޕްލައި ކުރެވޭ. ކޮންމެ ޕްރޮފެޝަނަކަށް ވަނަސް، އެ ރޯލްތަކުގެ ޒިންމާ އުފުލަން ޖެހޭނީ، ހަމައެކަނި މުޖުތަމައަށް ފައިދާ ހުރި ގޮތަކަށް" ކަމަށެވެ.
މި ރަސްމިއްޔާތުގައި ވަޒީރު ވަނީ ތަޢުލީމީ ދާއިރާއިން ކުރިއަށްދާ ދަރިވަރުންނަކީ ޤައުމުގެ މުސްތަޤުބަލު ބައްޓަންކުރުމުގައި އިސްދައުރެއް އަދާކުރާނެ ބައެއްކަން ފާހަގަކުރައްވައި، ހުރިހާ ދަސްވެނިންނަށް މަރުޙަބާ ދަންނަވާފައެވެ.
