މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ ޑެޕިއުޓީ މެނޭޖިން ޑިރެކްޓަރުގެ މަގާމަށާއި، އެ ކުންފުނީގެ ބޯޑު މެންބަރުކަމުގެ މަގާމަށް އަހްމަދު މުބީން މިއަދު އައްޔަންކޮށްފިއެވެ.
މުބީނަކީ މި ސަރުކާރު އައިފަހުން އެންމެ ފުރަތަމަ ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރްއޭސީއެލް) ގެ މެނޭޖިން ޑިރެކްޓަރުގެ މަގާމު އަދާކުރެއްވި ބޭފުޅާއެވެ. ނަމަވެސް، ސަރުކާރުން އެ ކުންފުނި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ދަށަށް ބަދަލުކުރުމަށް ނިންމުމާ ގުޅިގެން، އޭނާ ވަނީ މިދިޔަ އަހަރު އެ މަގާމުން އިސްތިއުފާ ދެއްވާފައެވެ.
ރީޖަނަލް އެއާޕޯޓްސްގެ މަގާމުން ވަކިވެވަޑައިގަތުމަށްފަހު، މުބީން ބޮޑަށް ފެނިގެން ގޮސްފައިވަނީ ކުޅިވަރުގެ ދާއިރާއިންނެވެ. އެގޮތުން ރާއްޖޭގެ މަޝްހޫރު ފުޓްބޯޅަ ކްލަބް، ނިއުރޭޑިއެންޓް ސްޕޯޓްސް ކްލަބުގެ ޗެއާމަންކަމާ ހަވާލުވެވަޑައިގެން، އެ ކްލަބަށް ބޮޑެތި ކާމިޔާބީތަކެއް ހޯދައިދިނުމުގައި އޭނާ މުހިންމު ދައުރެއް އަދާކުރައްވާފައިވެއެވެ.
އެމްޓީސީސީގެ އިސް މަގާމަކަށް މުބީން މި އައްޔަންކުރެއްވީ، ސަރުކާރުގެ ކުންފުނިތަކުގެ ހިންގުން ހަރުދަނާކުރުމަށް ކުރަމުންދާ މަސައްކަތްތަކުގެ ތެރެއިންނެވެ. މުބީނަކީ މީގެ ކުރިން ރައްޔިތުންގެ މަޖިލީހުގެ މެންބަރުކަންވެސް ކުރައްވާފައިވާ ބޭފުޅެއްކަން ފާހަގަކޮށްލެވެއެވެ.
