މާލެ ސަރަޙައްދުގައި ހިނގާފައިވާ ވައްކަމާއި ފޭރުމުގެ އެކި މައްސަލަތަކާ ގުޅިގެން، 559,879 އަށްވުރެ ގިނަ ރުފިޔާގެ ފައިސާއާއި ތަކެތި ފުލުހުން ހޯދައިފިއެވެ. މިކަން ހާމަކޮށްފައިވަނީ ދިވެހި ފުލުހުންގެ ޚިދުމަތުން އާންމުކޮށްފައިވާ އެންމެ ފަހުގެ ތަފާސްހިސާބުތަކުގައެވެ.
ފުލުހުން ވިދާޅުވި ގޮތުގައި މި ތަކެއްޗާއި ފައިސާ ހޯދާފައިވަނީ 2026 އޭޕްރީލް 26 އިން މޭ 2 ގެ ނިޔަލަށް ކުރިއަށްގެންދިޔަ މަސައްކަތްތަކުގެ ތެރެއިންނެވެ. މީގެ ތެރޭގައި ހިމެނެނީ ނަގުދު ފައިސާގެ އިތުރުން، ފޭރިގެންފައިވާ ނުވަތަ ވަގަށް ނަގާފައިވާ ތަކެތީގެ އަންދާޒާ ކުރެވޭ އަގު ކަމަށްވެސް ފުލުހުން މައުލޫމާތުދެއްވައެވެ.
ފުލުހުން ހާމަކޮށްފައިވާ ތަފާސްހިސާބުތަކަށް ބަލާއިރު، މި މުއްދަތުގެ ތެރޭގައި އެންމެ ގިނަ އަދަދެއްގެ ފައިސާއާއި ތަކެތި ހޯދާފައިވަނީ ގަލޮޅު ޕޮލިސް ސްޓޭޝަނުންނެވެ. އެ ސްޓޭޝަނުން 278,910 ރުފިޔާ ހޯދާފައިވެއެވެ.
މީގެ އިތުރުން، މާފަންނު ޕޮލިސް ސްޓޭޝަނުން 184,800 ރުފިޔާ ހޯދާފައިވާއިރު، ހެންވޭރު ޕޮލިސް ސްޓޭޝަނުން 94,169 ރުފިޔާ ވަނީ ހޯދާފައެވެ. އަދި ވިލިމާލެ ޕޮލިސް ސްޓޭޝަނުން 2,000 ރުފިޔާ ހޯދާފައިވާކަމަށް ފުލުހުންގެ ހިސާބުތަކުން ދައްކައެވެ.
ވައްކަމާއި ފޭރުމުގެ މައްސަލަތައް މަދުކުރުމަށާއި، ގެއްލޭ ތަކެތި ހޯދުމަށް ފުލުހުން އަންނަނީ މާލެ ސަރަޙައްދުގައި ހާއްސަ މަސައްކަތްތަކެއް ކުރަމުންނެވެ.
