އައްޑޫ ސިޓީގެ އިޤްތިޞާދު ހިންގައިގަތުމަށް ހުރި ގޮންޖެހުންތައް ދެނެގަތުމަށްޓަކައި ބާއްވާ "އައްޑޫ ބިޒްނަސް ޑައިލޮގް" މިއަދު ފަށައިފިއެވެ. މި މަހާސިންތާއަކީ މިނިސްޓްރީ އޮފް އިކޮނޮމިކް ޑިވެލޮޕްމެންޓް އެންޑް ޓްރޭޑާއި ބިޒްނަސް ސެންޓަރ ކޯޕަރޭޝަން (ބީސީސީ) ގުޅިގެން ކުރިއަށްގެންދާ މުހިންމު ހަރަކާތެކެވެ.
އައްޑޫ ސިޓީ ހިތަދޫ ސްކޫލުގައި މިމަހުގެ 13 އިން 14 އަށް ދެ ދުވަހުގެ މުއްދަތަށް ކުރިއަށްގެންދާ މި މަހާސިންތާ ފެށުމުގެ ރަސްމިއްޔާތު ޝަރަފުވެރިކޮށްދެއްވީ އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސަޢީދުއެވެ. މި ބައްދަލުވުމުގައި އައްޑޫގެ ވިޔަފާރިވެރިންނާއި އިޤްތިޞާދީ ދާއިރާގެ އެކި ފަރާތްތަކުން ބައިވެރިވެއެވެ.
މި މަހާސިންތާގެ މައިގަނޑު މަޤްޞަދަކީ އައްޑޫ ސިޓީއަށް ހަލުވި ތަރައްޤީއެއް ނުވަތަ އެކްސްލެރޭޓެޑް ޑިވެލޮޕްމެންޓެއް ގެނައުމަށްޓަކައި 2027 އިން 2029 އަށް ޚާއްސަ އިނާޔާތްތަކެއް ދިނުމަށް ރައީސުލްޖުމްހޫރިއްޔާ ނިންމަވާފައިވާ ނިންމެވުން ތަންފީޒު ކުރުމަށް މަގުފަހިކުރުމެވެ. ސަރުކާރުގެ އަމާޒަކީ މި ނިންމުމުގެ ދަށުން އައްޑޫގެ އިޤްތިޞާދީ ދުވެލި ހަލުވިކުރުމަށް ބޭނުންވާ މަސައްކަތްތައް ބާރުމިނުގައި ކުރިއަށް ގެންދިއުމެވެ.
ސަރުކާރުން ހާމަކުރައްވާފައިވާ ގޮތުގައި، މި މަހާސިންތާގެ ތެރެއިން ވިޔަފާރިވެރިންގެ ހުރި ކަންބޮޑުވުންތަކާއި އެފަރާތްތަކުން އެންމެ ބޭނުންވާ ކަންކަން ދެނެގަތުމަށް ޚާއްސަ ސަމާލުކަމެއް ދެވޭނެއެވެ. މިއީ އައްޑޫގެ އިޤްތިޞާދު ހަރުދަނާކުރުމަށް ކުރެވޭ މަސައްކަތުގައި ވިޔަފާރިވެރިންގެ ޚިޔާލާއި މަޝްވަރާ ހޯދުމަށް ހުޅުވާލެވުނު މުހިންމު ފުރުޞަތެކެވެ.
