ދ. މީދޫގައި ފިއުލް ސަޕްލައި މޯލްޑިވްސް (އެފްއެސްއެމް) ގެ ފިއުލް ސްޓޭޝަނެއް ރަސްމީކޮށް ހުޅުވައި، އެ ރަށުގައި ތެލުގެ ޚިދުމަތް ދޭން ފަށައިފިއެވެ. މިއީ ރާއްޖޭގެ ހުރިހާ ސަރަޙައްދަކަށް އިތުބާރު ހުރި އަދި ފަސޭހަކަމާއެކު ތެޔޮ ލިބޭނެ އިންތިޒާމު ހަމަޖެއްސުމަށް ސަރުކާރުން ކުރިއަށްގެންދާ މަޝްރޫޢުގެ ދަށުން އެޅުނު މުހިންމު ފިޔަވަޅެކެވެ.
މިކަމާ ގުޅޭގޮތުން އެފްއެސްއެމް އިން ބުނީ، މީދޫގައި ޚިދުމަތް ދޭން ފެށުމަކީ ސަރުކާރުގެ މަޝްރޫޢުގެ ދަށުން ރާއްޖޭގެ އެކި ކަންކޮޅުތަކަށް ފިއުލް ސާވިސް ފުޅާކުރުމަށް ކުރަމުންދާ މަސައްކަތުގެ ތެރެއިން ކުރިއަށް އެޅުނު އިތުރު ފިޔަވަޅެއް ކަމަށެވެ. "ޓީމް އެފްއެސްއެމް އިން މިވަނީ ރަސްމީކޮށް ދ. މީދޫގައި ޚިދުމަތް ދޭން ފަށާފައި. މިއީ ސަރުކާރުގެ އިސްނެގުމުގެ ދަށުން މުޅި ރާއްޖެއަށް ފުޅާކުރާ ޚިދުމަތުގެ ތެރެއިން ލިބުނު ކުރިއެރުމެއް،" އެ ކުންފުނިން ހާމަކޮށްފައިވެއެވެ.
ރާއްޖޭގެ 18 ރަށެއްގައި ފިއުލް ސްކިޑް ނުވަތަ ތެޔޮ ގުދަންކޮށް ވިއްކާނެ ނިޒާމުތައް ޤާއިމުކުރުމުގެ ބޮޑު މަޝްރޫޢު އިފްތިތާހްކޮށްފައިވަނީ 2024 ވަނަ އަހަރުގެ ނޮވެންބަރު މަހުގެ ތެރޭގައެވެ. މި މަޝްރޫޢުގެ މައިގަނޑު މަޤްޞަދަކީ ރަށްރަށުގެ އާންމު ރައްޔިތުންނަށާއި، ޚާއްޞަކޮށް މަސްވެރިންނަށް ފަސޭހަކަމާއެކު އަދި ހެޔޮ އަގުގައި ތެޔޮ ލިބޭނެ މަގު ފަހިކޮށްދިނުމެވެ.
މީދޫގައި މި ޚިދުމަތް ފެށުމާއެކު، އެ ސަރަޙައްދުގެ ކަނޑުދަތުރުފަތުރު ކުރާ ފަރާތްތަކަށާއި އިޤްތިޞާދީ މަސައްކަތްތަކަށް ބޮޑު ލުޔެއް ލިބިގެންދާނެ ކަމަށް ބެލެވެއެވެ. ސަރުކާރުން އަމާޒު ހިފާފައިވަނީ މި މަޝްރޫޢުގެ ދަށުން ކަނޑައެޅިފައިވާ ހުރިހާ ރަށެއްގައި ވީހާވެސް އަވަހަށް މި ޚިދުމަތް ޤާއިމުކޮށް ނިންމުމަށެވެ.
