ވ. އަތޮޅުގެ ކަނޑުގެ ސަރަހައްދުގައި ފީނަން އުޅުމުގެ ތެރޭގައި ގެއްލުނު އިޓަލީވިލާތުގެ ފަތުރުވެރިންގެ ތެރެއިން ބާކީ ތިބި ހަތަރު މީހުންގެ ހަށިގަނޑު މިއަދު ފެނިއްޖެއެވެ. މި ހިތާމަވެރި ހާދިސާ ހިނގާފައިވަނީ 14 މޭ 2026 ގައެވެ. މި ހާދިސާގައި ޖުމްލަ 5 ފަތުރުވެރިން ގެއްލުނުއިރު، އޭގެ ތެރެއިން އެކެއްގެ ހަށިގަނޑު ހާދިސާ ހިނގި ދުވަހު ވަނީ ފެނިފައެވެ.
މި އޮޕަރޭޝަނާ ގުޅޭގޮތުން ސަރުކާރުން ހާމަކުރި ގޮތުގައި، ގެއްލުނު މީހުން ހޯދުމުގެ މަސައްކަތުގައި އެމް.އެން.ޑީ.އެފް ކޯސްޓްގާޑާއި، ފުލުހުންގެ އިތުރުން ފިންލޭންޑްގެ ތަޖުރިބާކާރު ތިން ޑައިވަރުންގެ ޓީމަކުން ވަނީ ބައިވެރިވެފައެވެ. މި ޓީމަކީ ޑައިވަރސް އެލަރޓް ނެޓްވަރކް (ޑީ.އޭ.އެން.) ޔޫރަޕް ފައުންޑޭޝަންގެ އެހީގައި ރާއްޖެ އައި ޓީމެކެވެ. މިއަދު ކުރިއަށްދިޔަ ސަރޗް އޮޕަރޭޝަނުގައި ބާކީ ތިބި ހަތަރު މީހުންގެ ހަށިގަނޑު ފެނިފައިވާއިރު، ކުރިއަށް އޮތް ދުވަސްތަކުގައި އެ ހަށިގަނޑުތައް ކަނޑުއަޑިން ނެގުމުގެ މަސައްކަތް ކުރިއަށްދާނެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މިދިޔަ ހުކުރު ދުވަހު ހާދިސާ ހިނގި ސަރަޙައްދަށް ވަޑައިގެން، މީހުން ހޯދުމުގެ މަސައްކަތް ކުރިއަށްދާ ގޮތް ވަރަށް ގާތުން ބައްލަވާލައްވާފައެވެ. އެ މަނިކުފާނުގެ އަރިހުގައި ޚާރިޖީ ވަޒީރު އިރުތިޝާމް އާދަމް ވެސް ބައިވެރިވެވަޑައިގެންނެވިއެވެ. ރައީސް ވަނީ ކޯސްޓްގާޑާއި ފުލުހުން ކުރަމުންދާ އަގުހުރި މަސައްކަތަށް ޝުކުރު އަދާކުރައްވައި، ސަރުކާރުގެ ފުރިހަމަ އެއްބާރުލުން ދެއްވާނެ ކަމުގެ ޔަޤީންކަން ދެއްވާފައެވެ.
މި އޮޕަރޭޝަން ކުރިއަށްދަނިކޮށް، 16 މޭ 2026 ގައި އެމް.އެން.ޑީ.އެފްގެ ސްޓާފް ސާޖަންޓު މުޙައްމަދު މަހުދީ ވަނީ ނިޔާވެފައެވެ. މަހުދީ ނިޔާވީ ގެއްލުނު ފަތުރުވެރިން ހޯދުމުގެ މަސައްކަތުގައި އުޅުއްވަނިކޮށެވެ. މި ހިތާމަވެރި ހާދިސާއާ ގުޅިގެން ސަރޗް އޮޕަރޭޝަން ވަގުތީ ގޮތުން މެދުކަނޑާލުމަށްފަހު، އަލުން ފަށާފައިވަނީ ފިންލޭންޑްގެ ޓީމާ އެކުގައެވެ.
އިޓަލީވިލާތުން ރާއްޖެއަށް ކަނޑައަޅާފައި ހުންނަވާ ނޮން-ރެޒިޑަންޓް ސަފީރު ޑަމިއާނޯ ފްރާންކޯވީގް ވަނީ ޚާރިޖީ ވަޒީރު އިރުތިޝާމް އާދަމްއާ ބައްދަލުކުރައްވައި، ދިވެހި ސަރުކާރުން ކުރަމުންދާ މަސައްކަތްތަކަށް ޝުކުރު އަދާކުރައްވާފައެވެ. އަދި ސްޓާފް ސާޖަންޓު މަހުދީ ނިޔާވުމާ ގުޅިގެން ސަފީރު ވަނީ ތަޢުޒިޔާ ވިދާޅުވެފައެވެ. މި ހާދިސާއާ ގުޅިގެން ރައީސުލްޖުމްހޫރިއްޔާ އާއި ޚާރިޖީ ވަޒީރު ވަނީ އިޓަލީގެ ވެރިންނަށް ތަޢުޒިޔާގެ މެސެޖު ފޮނުއްވާފައެވެ.
މި ހާދިސާއާ ގުޅިގެން ދިވެހި ޚާރިޖިއްޔާ، ޑިފެންސް މިނިސްޓްރީ، ހޯމްލޭންޑް ސެކިއުރިޓީ، ޓޫރިޒަމް މިނިސްޓްރީ އަދި ބަންޑާރަ ނައިބުގެ އޮފީހުން ދަނީ އިޓަލީ ސަރުކާރާ ގުޅިގެން ގާތުން މަސައްކަތް ކުރަމުންނެވެ.
