މިއަހަރުގެ ޙައްޖުވެރިންގެ އިސްވެރިޔަކަށް ނުވަތަ އަމީރުލް ޙައްޖުގެ ގޮތުގައި، އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ކަނޑައަޅުއްވައިފިއެވެ.
ކޮންމެ އަހަރަކުވެސް ރާއްޖެއިން ޙައްޖަށްދާ ފަރާތްތަކުގެ ހުރިހާ ކަމެއްގެ އެންމެ އިސްފަރާތަކަށް ބޭފުޅަކު ކަނޑައެޅުމަކީ ރައީސުލްޖުމްހޫރިއްޔާ ކުރައްވަމުން ގެންދަވާ ކަމެކެވެ. އެގޮތުން މިއަހަރުގެ އަމީރުލް ޙައްޖުގެ ގޮތުގައި ވަޒީރު ސަޢީދު ހަމަޖެއްސެވީ، ޙައްޖުވެރިންގެ ކަންކަން ގާތުން ބައްލަވައި، އެންމެހައި އިންތިޒާމުތައް ފުރިހަމައަށް ކުރިއަށްދާކަން ކަށަވަރުކުރެއްވުމަށެވެ.
1445 ވަނަ އަހަރުގެ ޙައްޖުގެ މަތިވެރި އަޅުކަމަށް ރާއްޖެއިންދާ ހުރިހާ ޙައްޖުވެރިން މިހާރު ވަނީ ސަޢުދީ ޢަރަބިއްޔާއަށް ގޮސްފައެވެ. ޙައްޖުވެރިން ސަޢުދީއަށް ގެންދިއުމުގެ މަސައްކަތް ކުރިއަށް ގެންގޮސްފައިވަނީ ޖުމްލަ ހަތަރު ފްލައިޓެއްގައެވެ. އޭގެ ތެރޭގައި ހިމެނެނީ ޤައުމީ އެއާލައިން، މޯލްޑިވިއަންގެ ދެ ފްލައިޓާއި ސަޢުދީ އެއާލައިންގެ ދެ ފްލައިޓެވެ.
ޙައްޖުވެރިންގެ ކަންކަން އިންތިޒާމުކުރުމުގައި ސަރުކާރުގެ ކަމާބެހޭ އިދާރާތަކުން އަންނަނީ ގިނަ މަސައްކަތްތަކެއް ކުރަމުންނެވެ. އަމީރުލް ޙައްޖުގެ ގޮތުގައި ވަޒީރު ސަޢީދު ކަނޑައެޅުއްވުމާއެކު، ޙައްޖުގެ އަޅުކަމުގެ ތެރޭގައި ދިވެހި ޙައްޖުވެރިންނަށް ބޭނުންވާ އެހީތެރިކަމާއި އިރުޝާދު ދިނުމުގެ އެންމެ އިސް ދައުރެއް އަދާކުރައްވާނީ އެމަނިކުފާނެވެ.
