ގއ. މާމެންދޫގައި ދުނިޔޭގެ ތިމާވެށީގެ ދުވަސް ފާހަގަކުރުމުގެ ގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިފްތިތާޙްކޮށްދެއްވާފައިވާ "5 މިލިއަން ގަސް އިންދުމުގެ މަޝްރޫޢު" ގެ ދަށުން ގއ. މާމެންދޫގައި ގަސް އިންދުމުގެ ޚާއްޞަ ހަރަކާތެއް މިއަދު ކުރިއަށް ގެންގޮސްފިއެވެ.
މިއަދު ހެނދުނު އެ ރަށުގައި ބޭއްވުނު މި ހަރަކާތަކީ ރާއްޖޭގެ ތިމާވެށި ޙިމާޔަތްކުރުމަށާއި، ފެހިކަން އިތުރުކުރުމަށް ސަރުކާރުން ފައްޓަވާފައިވާ މުހިންމު މަސައްކަތުގެ ބައެކެވެ. މާމެންދޫ ކައުންސިލާއި ރަށުގެ މުއައްސަސާތަކާއި އާންމު ރައްޔިތުން ގުޅިގެން ކުރިއަށްގެންދިޔަ މި ހަރަކާތުގައި ރަށުގެ އެކި ސަރަޙައްދުތަކުގައި ގިނަ އަދަދެއްގެ ގަސް ވަނީ އިންދާފައެވެ.
މި މަޝްރޫޢަކީ މޫސުމަށް އަންނަ ބަދަލުތަކުން ރާއްޖެ ސަލާމަތްކުރުމަށާއި، ދިވެހިރާއްޖޭގެ ގުދުރަތީ ރީތިކަން އަންނަން އޮތް ޖީލުތަކަށް ފޯރުކޮށްދިނުމަށްޓަކައި ރައީސް މުޢިއްޒުގެ ސަރުކާރުން ވަރަށް ބޮޑު އިސްކަމެއް ދެއްވައިގެން ކުރިއަށްގެންދަވާ މަޝްރޫޢެކެވެ.
މިއަދުގެ ހަރަކާތުގައި ވާހަކަދައްކަވަމުން ރަށު ކައުންސިލުން ފާހަގަކުރެއްވި ގޮތުގައި، މިފަދަ ހަރަކާތްތަކުގެ ސަބަބުން ތިމާވެއްޓަށް ލޯބިކުރާ ޖީލެއް ބިނާވުމަށް މަގުފަހިވެގެންދާނެއެވެ. އަދި މިއީ މުޅި ރާއްޖެ ފެހިކުރުމަށް ފަށާފައިވާ ގައުމީ މަސައްކަތަށް މާމެންދޫއިން ލިބިގެންދިޔަ ބޮޑު އެއްބާރުލުމެއްގެ ގޮތުގައި އެ ފަރާތުން ސިފަކުރެއްވިއެވެ.
ދުނިޔޭގެ ތިމާވެށީގެ ދުވަހާ ގުޅިގެން ރާއްޖޭގެ އެކި ކަންކޮޅުތަކުގައި މިފަދަ ގިނަ ހަރަކާތްތަކެއް ދަނީ ހިންގަމުންނެވެ.
މީގެއިތުރުން ޅ. އޮޅުވެލިފުށީގައި ވެސް މިއަދު ގަސް އިންދުމުގެ ޚާއްޞަ ހަރަކާތެއް ކުރިއަށް ގެންގޮސްފިއެވެ.
މި ހަރަކާތަކީ ރާއްޖޭގެ ތިމާވެށި ހިމާޔަތްކުރުމަށާއި، ފެހިކަން އިތުރުކުރުމަށް ސަރުކާރުން ހިފާފައިވާ އަމާޒަށް ވާސިލުވުމުގެ ގޮތުން އެ ރަށު ކައުންސިލާއި މުއައްސަސާތައް ގުޅިގެން ކުރިއަށް ގެންދިޔަ ހަރަކާތެކެވެ. މިއަދު ހެނދުނު އޮޅުވެލިފުށީގައި ބޭއްވުނު މި ރަސްމިއްޔާތުގައި ރަށުގެ ގިނަ އަދަދެއްގެ ރައްޔިތުންނާއި، ސްކޫލް ކުދިން އަދި ސަރުކާރުގެ އެކި އިދާރާތަކުގެ މުވައްޒަފުން ވަނީ ބައިވެރިވެފައެވެ.
މި މަޝްރޫޢުގެ މައިގަނޑު މަޤްޞަދަކީ މޫސުމަށް އަންނަ ބަދަލުތަކުން ރާއްޖޭގެ ނާޒުކު ތިމާވެށި ސަލާމަތްކުރުމަށް ބާރުއެޅުމާއި، އަންނަން އޮތް ޖީލުތަކަށް ފެހި އަދި ދުޅަހެޔޮ މާޙައުލެއް ފޯރުކޮށްދިނުމެވެ. ޅ. އޮޅުވެލިފުށީގައި މިއަދު އިންދާފައިވަނީ އެ ރަށުގެ ފަސްގަނޑާ ގުޅޭ، ހިޔާލިބޭ އަދި މޭވާ އަޅާ ބާވަތްތަކުގެ ގަސްތަކެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން ފަށާފައިވާ މި 5 މިލިއަން ގަސް އިންދުމުގެ މަޝްރޫޢަކީ ރާއްޖޭގެ ތިމާވެށީގެ ތާރީޚުގައިވެސް ހިންގޭ މިފަދަ އެންމެ ބޮޑު އެއް މަޝްރޫޢެވެ. މި މަޝްރޫޢުގެ ދަށުން ރާއްޖޭގެ ހުރިހާ ރަށެއްގައިވެސް ކުރިއަށް އޮތް ތަނުގައި މިފަދަ ހަރަކާތްތައް ބޭއްވުމަށް ވަނީ ހަމަޖެހިފައެވެ.
އަދި ތ. ގުރައިދޫގައި މިއަދު ވަނީ ގަސްއިންދުމުގެ ޚާއްޞަ ހަރަކާތްތަކެއް ބާއްވައިފައެވެ.
މި ހަރަކާތުގެ ދަށުން މިއަދު ގުރައިދޫގައި ވަނީ ގަސް އިންދުމުގެ މަސައްކަތުގެ އިތުރުން، އެ ރަށުގެ ގޮނޑުދޮށާއި ކަނޑޫފާ ސަރަހައްދު ސާފުކުރުމުގެ ބޮޑު ހަރަކާތެއް ކުރިއަށް ގެންގޮސްފައެވެ. މި ހަރަކާތް ކުރިއަށް ގެންގޮސްފައިވަނީ ރަށުގެ ތިމާވެށި ރައްކާތެރިކުރުމަށާއި، ދިވެހިރާއްޖޭގެ ފެހިކަން އިތުރުކުރުމަށް ސަރުކާރުން ފައްޓަވާފައިވާ އިސްނެންގެވުމަށް އެއްބާރުލުން ދިނުމުގެ މަގުސަދުގައެވެ.
މިއަދު ހެނދުނު ފެށިގެން ކުރިއަށްދިޔަ މި ހަރަކާތުގައި ރަށުގެ މުއައްސަސާތަކާއި، ކްލަބް ޖަމިއްޔާތަކުގެ އިތުރުން ގިނަ އަދަދެއްގެ އާންމު ރައްޔިތުން ބައިވެރިވެފައިވެއެވެ. ޚާއްޞަކޮށް ކަނޑޫފާ ސަރަހައްދަކީ ތިމާވެށީގެ ގޮތުން މުހިންމު ސަރަހައްދަކަށް ވުމުން، އެ ސަރަހައްދު ސާފުކޮށް ބެލެހެއްޓުމަށް މި ހަރަކާތުގެ ތެރެއިން ބޮޑު އިސްކަމެއް ވަނީ ދީފައެވެ.
5 މިލިއަން ގަސް އިންދުމުގެ މި މަޝްރޫޢަކީ ރައީސް މުޢިއްޒުގެ ސަރުކާރުން ރާއްޖޭގެ ތިމާވެށި ހިމާޔަތްކޮށް، މޫސުމަށް އަންނަ ބަދަލުތަކުން އަރައިގަތުމަށް ކުރިއަށްގެންދާ އެންމެ ބޮޑު އެއް މަޝްރޫޢެވެ. މި މަޝްރޫޢުގެ ދަށުން ރާއްޖޭގެ އެކި ކަންކޮޅުތަކުގައި ގަސް އިންދުމުގެ ހަރަކާތްތައް ދަނީ ބާރުދުވެލީގައި ކުރިއަށްދަމުންނެވެ.
