7 ވަނަ ޗައިނާ-ސައުތު އޭޝިއާ ކޯޕަރޭޝަން ފޯރަމް އަދި 10 ވަނަ ޗައިނާ-ސައުތު އޭޝިއާ އެކްސްޕޯ ހުޅުވުމުގެ ރަސްމިއްޔާތުގައި ތަޤުރީރުކުރައްވަމުން ބައިނަލްއަގުވާމީ ސުލްޙައާއި ހަމަޖެހުން ޤާއިމްކުރުމުގައި މަޝްވަރާއާއި ޑިޕްލޮމަސީގެ މުހިއްމުކަން، ޚާރިޖީ ވަޒީރު އިރުތިޝާމް އާދަމް ފާހަގަކުރައްވައިފިއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު އިރުތިޝާމް ވަނީ، ބައިނަލްއަގުވާމީ ސުލްޙައާއި ހަމަޖެހުން ޤާއިމްކުރުމުގައި މަޝްވަރާއާއި ޑިޕްލޮމަސީގެ މުހިއްމުކަން ވަރަށް ބޮޑަށް ފާހަގަކުރައްވާފައެވެ. ވަޒީރު ވިދާޅުވީ ބައިނަލްއަގުވާމީ މުޖްތަމަޢުއަށް ކުރިމަތިވެފައިވާ އެކި ގޮންޖެހުންތަކުން އަރައިގަތުމަށްޓަކައި ހުރިހާ ޤައުމުތަކެއް ގުޅިގެން މަސައްކަތް ކުރުމަކީ ކޮންމެހެން ބޭނުންތެރި ކަމެއް ކަމަށެވެ.
ސަރަޙައްދީ ގުޅުންތަކުގެ މައްޗަށް އަލިއަޅުއްވާލައްވަމުން، ރާއްޖެއާއި ޗައިނާއާ ދެމެދު އޮތް ގާތް ގުޅުމުގެ މައްޗަށްވެސް ވަޒީރު ވާހަކަފުޅު ދެއްކެވިއެވެ. އެގޮތުން 2024 ވަނަ އަހަރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޗައިނާއަށް ކުރެއްވި ފުރަމާނަ ދަތުރުފުޅުގެ ސަބަބުން، ދެ ޤައުމުގެ ދެމެދުގައި އޮތް ޒަމާންވީ ގާތް ގުޅުން އިތުރަށް ބަދަހިވެ، އާ އުސްމިންތަކަކަށް ވާސިލްވެފައިވާކަން ވަޒީރު ފާހަގަކުރެއްވިއެވެ.
މި ފޯރަމަކީ ސަރަޙައްދީ އެއްބާރުލުން އިތުރުކުރުމަށާއި، އިޤްތިޞާދީ އަދި އިޖުތިމާޢީ ގޮތުން ގުޅުން ބަދަހިކުރުމަށް ލިބޭ މުހިއްމު ފުރުޞަތެއްގެ ގޮތުގައި ބެލެވެއެވެ. ވަޒީރުގެ ވާހަކަފުޅު ނިންމަވާލެއްވީ ބައިނަލްއަގުވާމީ މައިދާނުގައި ރާއްޖެއިން އަދާކުރާ އިސް ދައުރު ކުރިއަށް އޮތް ތަނުގައިވެސް ދަމަހައްޓާނެ ކަމުގެ ޔަޤީންކަން ދެއްވަމުންނެވެ.
