ބާޒާރުގައި ފިޔާގެ އަގު އުފުލި، ފިޔާ ލިބުމުގައި ދަތިތަކެއް އުޅޭކަމުގެ ޝަކުވާ އާންމުން ކުރަމުންދަނިކޮށް، އެސްޓީއޯގެ ގުދަންތަކުގައި ފިޔާ އެބަހުރި ކަމަށާއި ކުރިއެކޭވެސް އެއްގޮތަށް ހެޔޮ އަގުގައި ފިޔާ ލިބެން ހުންނާނެ ކަމަށް އެ ކުންފުނިން ބުނެފިއެވެ.
ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން މިއަދު މީޑިއާތަކަށް ފޮނުވި މެސެޖެއްގައި ބުނެފައިވަނީ، ސޯޝަލް މީޑިއާގެ އެކި މަންސަތަކުގައި ފިޔާ ލިބުމުގައި ދަތިތަކެއް އުޅޭ ކަމަށާއި ފިޔާގެ އަގު އިންތިހާއަށް ބޮޑުވެފައިވާ ކަމަށް ބުނެ ފެތުރެމުންދާ ޚަބަރުތަކާ ގުޅިގެން ކަންބޮޑުވާ ކަމަށެވެ. އެސްޓީއޯ އިން ކަށަވަރުކޮށްދިން ގޮތުގައި، އެ ކުންފުނީގެ ފިހާރަތަކުން މިހާރުވެސް ފިޔާ ކިލޯއެއް 13 ރުފިޔާގެ މަގުން ލިބެން ހުންނާނެއެވެ. މިއީ މީގެ ކުރިންވެސް އެސްޓީއޯ އިން ފިޔާ ވިއްކަމުން އައި އަގެވެ.
އެސްޓީއޯ އިން އިތުރަށް ހާމަކުރި ގޮތުގައި، ކުރިއަށް އޮތް ހަފްތާގެ ތެރޭގައި ހޯލްސޭލްކޮށް ފިޔާ ދޫކުރަން ފެށުމަށް ވަނީ ނިންމާފައެވެ. މީގެ ސަބަބުން ބާޒާރުގައި ފިޔާގެ އަގު ކޮންޓްރޯލްވެ، އާންމުންނަށް ލިބޭ ތަކުލީފުތަކަށް ހައްލެއް ލިބިގެންދާނެ ކަމަށް އެ ކުންފުނިން އުންމީދު ކުރެއެވެ.
މާލޭގެ އިތުރުން އަތޮޅުތެރޭގެ ރަށްތަކަށް ފިޔާ ފޯރުކޮށްދިނުމަށްޓަކައި، އެސްޓީއޯގެ ރީޖަނަލް ފިހާރަތަކުން ފިޔާ ލިބޭނެ އިންތިޒާމްތައް ހަމަޖެއްސުމުގެ މަސައްކަތް ބާރުދުވެލީގައި ކުރިއަށްދާ ކަމަށްވެސް އެ ކުންފުނިން ބުންޏެވެ.
މި ދުވަސްވަރަކީ ބައިނަލްއަގުވާމީ ބާޒާރުގައި ތަކެތީގެ އަގަށް އަންނަ ބަދަލުތަކާ ގުޅިގެން ރާއްޖޭގެ ބާޒާރުގައިވެސް ބައެއް ބާވަތްތަކުގެ އަގު އުފުލެމުންދާ ދުވަސްވަރެކެވެ. ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަންނަނީ އަސާސީ ކާބޯތަކެތީގެ އަގު ހެޔޮކޮށް ރައްޔިތުންނަށް ފޯރުކޮށްދިނުމަށް ގިނަ މަސައްކަތްތަކެއް ކުރަމުންނެވެ.
