ސަޢުދީ ޢަރަބިއްޔާގެ މަޝްހޫރު ބަޖެޓް އެއާލައިން "ފްލައިނާސް" އިން ރާއްޖެއަށް ކުރާ ޝެޑިއުލް ދަތުރުތައް އަލުން ފަށައިފިއެވެ.
މި ދަތުރުތައް އަލުން ފެށުމުގެ ގޮތުން ރިޔާދުން ފުރައިގެން ވެލާނާ އިންޓަނޭޝަނަލް އެއާޕޯޓަށް (ވީ.އައި.އޭ) އައި ފްލައިނާސްގެ ފުރަތަމަ ފްލައިޓަށް އެއާޕޯޓުން ވަނީ ހޫނު މަރުޙަބާއެއް ކިޔާފައެވެ.
ފްލައިނާސް އިން މަޢުލޫމާތު ދޭ ގޮތުގައި، މި ދަތުރުތަކުގެ ދަށުން ސަޢުދީގެ ވެރިރަށް ރިޔާދާއި ރާއްޖެއާ ދެމެދު ހަފުތާއަކު ތިން ދަތުރު ކުރުމަށް ވަނީ ހަމަޖެހިފައެވެ. މިއީ މެދުއިރުމަތީގެ ޤައުމުތަކުން ރާއްޖެއަށް ޒިޔާރަތްކުރާ ފަތުރުވެރިންނަށް ލިބިގެންދާނެ ވަރަށް ބޮޑު ލުޔެކެވެ.
މިކަމާ ގުޅޭގޮތުން މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އިން ފާހަގަކުރި ގޮތުގައި، ފްލައިނާސްގެ ދަތުރުތައް އަލުން ފެށުމަކީ ދެ ޤައުމުގެ ދެމެދުގައި އޮތް ވައިގެ ދަތުރުފަތުރުގެ ގުޅުން އިތުރަށް ވަރުގަދަވެގެންދާނެ ކަމެކެވެ. އަދި މިއީ ރާއްޖޭގެ ފަތުރުވެރިކަމަށް ލިބޭނެ އިތުރު ކުރިއެރުމެއްކަން އެ ކުންފުނިން ފާހަގަކުރެއެވެ.
އެމް.އޭ.ސީ.އެލްގެ މައިގަނޑު އަމާޒަކީ ދުނިޔޭގެ އެކި ކަންކޮޅުތަކުގެ އިތުރު އެއާލައިންތަކާ ގުޅިގެން ރާއްޖޭގެ އޭވިއޭޝަން ދާއިރާ އިތުރަށް ކުރިއަރުވައި، ރާއްޖެ އަންނަ ފަތުރުވެރިންގެ އަދަދު އިތުރުކުރުމަށް މަގުފަހިކޮށްދިނުމެވެ.
ފްލައިނާސްގެ ދަތުރުތައް އަލުން މި ފެށީ، ސަޢުދީ ޢަރަބިއްޔާއަކީ ރާއްޖޭގެ ފަތުރުވެރިކަމުގެ މުހިންމު މާކެޓަކަށް ވެފައިވާ ދަނޑިވަޅެއްގައެވެ. މި ދަތުރުތަކުގެ ސަބަބުން ދެ ޤައުމުގެ ދެމެދުގައި ކުރެވޭ ދަތުރުތައް އިތުރުވެ، އިޤްތިޞާދީ ގޮތުންވެސް ފައިދާ ކުރާނެ ކަމަށް ބެލެވެއެވެ.
